'Spider-Man: No Way Home' bawk pakhatna

North America Box Office-ah 'Spider-Man: No Way Home' bawkin sum a lalut tam leh ber a, 'Sing 2' chu pahnihna niin 'The King's Man' chu pathumna a ni ve bawk.

'Spider-Man: No Way Home' bawk no. 1
'Spider-Man: No Way Home' hlawhtlin zia chu kan hre ṭheuh tawh awm e. Tlangzarh a nih aṭanga kar thum em pawh a liam hmain khawvela film sum lalut tam 12-na ni thei, kum 2021 chhunga film tlangzarh zinga sum lalut tam ber, Sony film siam tawh zawng zawnga la hlawhtling ber 'Spider-Man: No Way Home' hian kar tawp liam ta khan North America-a theatre 4,206 aṭangin $56,023,590 lai sum a lalut leh hem hem mai.

He film hian US leh Canada aṭang ringawtin $613,600,664 lai sum a lalut der tawh a, ram dang aṭangin $759,000,000 lai lalut tawh bawkin khawvel puma cinema hall hrang hrang aṭanga a sum lakluh tawh zawng zawng chu $1,372,600,664 lai a ni tawh!

'Spider-Man: No Way Home' hi film review-tu lamin an fak rawn a ni ber a, a chhunzawmna siam leh ngei pawh an tum fel tawh niin producer Kevin Feige leh Amy Pascal-te chuan an sawi tawh a ni.

Pahnihna 'Sing 2', pathumna 'The King's Man'
Computer-animated musical comedy film 'Sing 2' chu sum lalut tam pahnihna a ni a, theatre 3,892 aṭangin $20,166,520 a lalut. 'The King's Man' chu pathumna a ni a, mahse a sum lakluh erawh 'Sing 2' nen a inthlau viau. 'The King's Man' hian $4,500,000 a lalut a ni.

Top 10-ah film thar a awm lo
US lamah film tlangzarh thar a awm meuh lo a, top 10-a lang zingah film thar a awm lem lo. 'American Underdog' chu palina a ni a, beisei phak lo 'The Matrix Resurrections' chu pangana a ni bawk.

Box Office Mojo chart-ah hrim hrim pawh film thar pakhat chiah a awm a, 27-na 'Jockey' tih loh chu Krismas leh kumthar inkara film tlangzarh thar a awm lo niin a lang.