'The Umbrella Academy’ S3 kuminah a chhuak dawn

'The Umbrella Academy’season 3 chu kumin chhung ngeiin Netflix lamah tihchhuah hman tum a nih thu tarlan a ni a, tihchhuah hun tur erawh puanzar a la ni lo.

My Chemical Romance vocalist Gerard Way-a superhero comics ziah behchhana siam series hi Steve Blackman leh Jeremy Slater-te chuan Netflix-a chhuah turin an siam a, Netflix series hit pawl tak pawh a ni.

Nikum November thlaah khan Netflix lam pawhin an siam chhunzawm leh dawn thu an lo tarlang tawh a, tlangzarh hun tur tak erawh hriat la ni lo mah se kumin chhung ngei chuan kan en hman dawn tih erawh a chiang tawh thung.

Elliot Page, Tom Hopper, David Castaneda, Emmy Raver-Lampman, Robert Sheehan, Aidan Gallagher leh Cameron Britton-te channa series hi kumin chhungin tihchhuah chhunzawm leh a ni dawn tih hi Twitter lama Umbrella Academy page-ah puanzar a ni a, fan-te pawh an phur tawh hle a ni.