Box Office ; En hlawh leh sum lalut hnem ber Mission: Impossible - Fallout

North American Box Office hi khawvelin film hlawhtling a tehna pawimawh tak pakhat a ni a, an chet ṭhat leh ṭhat lohin kawngro thui tak a su ṭhin. Box Office-ah hian Mission: Impossible - Fallout chu sum lalut hnem ber a ni a, North America lamah chuan film en hlawh leh sum pawh lalut hnem ber a ni mek.

Tom Cruise leh Rebecca Fer­guson te channa action film hian kar liamta chhung khan $mtd 61.5 zet lalutin No.1 a hauh a ni.

Mission: Impossible hi July 25 tlangzarh a ni a, a hit nghal rem rem hle. Khawvel ram hrang hrangah chhuah chhoh mek a ni a, a sum lakluh pawh a turu hle. Box Office aṭanga a lakluh ringawt pawh hi $mtd 153.5 zet a tling tawh a ni!

American film director lar Christopher McQuarrie kut chhuak a nih miau avangin dahniam chi a ni lo a, khawvel mipui en chak a ni.

A changtu zingah hian Henry Cavilll leh English actress Vanes­sa Kirby te an tel bawk a, khawvel ram hrang hrang aṭanga $mtd 92 zet a lalut thei pawh thil mak a ni lo.

Box Office-a pahnihna hauh­tu chu musical/comedy film lar 'Mamma Mia: Here We Go Again' a ni. He film hi July 18 khan tlangzarh a ni a, kar liam ta chhung khan $mtd 15 zet a lalut leh a ni. Khawvel hmun dang aṭanga a lakluh nen chuan $mtd 70.4 zet a la tling a, tun lai film chhuak thar tam takin an tluk loh a la ni.

He tih lai hian Equalizer 2 nen an sum lakluh a inthlau lo hle. Equalizer 2 hi a sum lakluh 61% zetin tlahniam tawh mah se, $mtd 14 lalutin pathumna a la ni fan. Hotel Transylvania 3: Summer Vacation chuan $mtd 12.3 thawk chhuakin a dawt a ni.

Science Fiction film chhuak thar Teen Titans Go! to the Movies chu $mtd 10.5 lalutin top 5-ah a inhlang kai bawk. He film hi a siam nan $mtd 10 vel sen ral ani a, senso an hmuchhuak rang hle.

Marvel kutchhuak Ant-Man and the Wasp chu sum lalut tam parukna niin, Incredibles 2 chuan a dawt. Kumina film chhuak tawh zinga hit ber pawl Jurassic World: Fallen Kingdom chu pariatna a ni a, $mtd 6.7 a la hlawh chhuak pha bawk. June 8 khan tlangzarh a ni a, tun thlenga a sum hmuhchhuah tawh zat chu $tld 1.235 zet a ni.

Jurassic World hi 2018-a film tlangzarh zingah sum lalut tam pariatna a ni. Tun hnai mai aṭang khan China-ah chhuah a ni a, $mtd 225.7 a lalut der tawh.

American actor Dwayne 'The Rock' Johnson channa Skys­craper leh The First Purge te chu top 10-ah an lang ve bawk.