Arnold Schwarzenegger & Linda Hamilton Terminator 6-ah kan hmu leh dawn

Terminator film en ṭhin te tan thu lawmawm a awm leh ta a, Arnold Schwarzenegger leh Linda Hamilton te chu Terminator chhuak thar turah an chang dun leh dawn.

JUne thla khan Terminator film siam leh a nih tur thu hi puan a lo ni tawh a, a changtu tur an inrinsiak nghal laih laih. Hetiang a nih mek lai hian Arnold leh Hamilton te sawi rik an ni a, chu chu a takin a thleng dawn niin a lang ta. Thlalak hrang hrang an tarlanah pawh hmuh tur an awm a, an chang dun leh a nih pawhin a mak lo ang.

California Governor hlui Arnold Schwarzenegger hi Fiji Prime Minister, Frank Bainimarama chuan Climate Action Pacific Partnership (CAPP) conference-ah tel turin a sawm a, mahse a hmel hmuh tur a awm lo. Hemi chungchangah hian kum 71 mi Arnold chuan thupha chawiin, "Film changin hun ka hmang mek a, ka tihlawhtling thei lo a ni. In mi hriatthiamna ka ngen e," a ti.

Hei hian engkim a nemghetah ngaih ani a, Linda Hamilton (61) pawh a chiang tawha ngaih a ni bawk.

Hetih rual hian Terminator re­boot chhuah hun tur hi tarlan a la ni lo thung.