Ronnie James Dio documentary kuminah

Heavy metal fan-te'n an nghahhlelh em em Ronnie James Dio documentary chu kumin chhung ngei hian tlangzarh a ni dawn.

Kum 67 mi nia kum 2010-a fam chang ta heavy metal icon Ronnie James Dio documentary hi kum 2020 khan siam a nih dawn thu leh Don Argott leh Damian Fenton-te chu buaipuitu an nih thu tarlan a lo ni tawh a, kum khat chuang a ral hnuah peihfel a nih thu puanzar a ni ta.

A thihsan tak a nupui Wendy Walters chuan,"Ronnie documentary nghahhlelhawm taka BMG ka thawhpui thei hi ka phur hle. Ronnie khan a fan-te a ngaina tak zet a, he documentary pawh hi a fan-te'n an ngaih hlut ngei ka beisei," tiin a sawi. He documentary film-ah hian Ronnie James Dio video footage leh thlalak la tihchhuah ngai miah lohte hmuh tur a awm dawn a, a ṭhian leh a chhungkhat hnai zualte bula a hun hman dan ṭhenkhat tarlan a ni dawn bawk.

Wendy chuan tuhnai lawk khan documentary chu a 'emotional' hle tih a lo sawi chhuak tawh bawk a, Judas Priest frontman Rob Halford, Tenacious D rocker leh Hollywood actor Jack Black bakah Black Sabbath Geezer Butler-te pawh interview zingah an tel tih a sawi lang a ni.

Khawvela band lar ber ber- Black Sabbath, Deep Purple, Dio leh Rainbow-ahte pawh lo tel tawh ṭhin heavy metal legend Dio hi heavy metal artist awm tawh zawng zawng zinga ropui ber pawl a ni a, 'Metal Horns' tilartu niin Revolver Golden Gods Award 2010-ah khan "Best Metal singer"-ah puan a lo ni tawh bawk.