Suspicion: Kunal Nayyar kan hlimpui dawn lo niin a lang

Kum 2021 kum tawp lamah khan Apple TV Plus chuan an series tihchhuah thar tur 'Suspicion' hlimthla an tarlang a, chu hlimthla aṭang chuan The Big Bang Theory aṭanga kan hmelhriat Kunal Nayyar landan hmang a dang nghal hle.

The Big Bang Theory fan-te chuan comedy genre-a Kunal Nayyar chan thiam zia an hria. Kum 12 chhung tehmeuh a fan-te a chawk hlim tawh a, kum 2007 aṭanga 2019 thleng khan mi tam takin Raj Koothrappali (Kunal Nayyar) chu an lo hlimpui tawh a nih kha. Netflix anthology series 'Criminal'-ah danglam takin kan hmu tawh a, Apple TV+ series thar turah pawh hian a lan dan a danglam lehpek dawn viau mai

'Suspicion' hi nikum May thlaah khan season hmasa ber chu an chang zo vek tawh a, February 4 hian ram hrang hranga en theih turin an tlangzarh tawh dawn. Chu series-a Kunal Nayyar khawsazia erawh mi tam takin an hriat dan a ni tawh dawn lo tih a chiang.

He series-ah hian Uma Thurman pawh a chang a, Israeli thriller TV series 'False Flag' behchhana an siam niin thriller lampang tuipuitute tana film hmuhnawm tak tur a ni.

Kunal Nayyar thukhawchang
Raj Koothrappali tia kan hriat lar Nayyar hian Raj character aṭanga hla taka a awm duh thu kum 2020-ah khan a lo sawi tawh a, 'Criminal' lamah pawh sitcom lama a khawsak ang lo takin tualthattu lemah thiam takin a inlan tawh a nih nghe nghe kha.

'Criminal'-a a inlan danin a fan-te a barakhaih ṭum khan Nayyar chuan drama lam chu a chan chak zawng tak a nih thu a sawi tawh a ni. "Ka landan hrim hrimah leh ka aw aṭang pawhin hriat hran ka awl hle. Ka hmel pawh hriat hran a awl... chumi avang chuan min daidangtu ṭhiah vekna tur thil tih hi a pawimawh ka ti a ni," tiin a sawi.

Suspicion, eng lam hawi tur nge?
"American sumdawng lian (Thurman) fapa chu New York-a hotel aṭangin ruk bo a ni a, ruk bo a nih zana chu hotel-a thleng ve British mi palite chu rinhlehna mita melh nghal an ni.

Chung mi palite chuan National Crime Agency leh FBI ṭangdunte laka pawikhawihtu an nih lohzia an chhawp chhuah a ṭul viau lai chuan anmahniho chuan rintlak an ni loin an inhre ve leh zel bawk a.

Chu inrukbonaah chuan tunge inrawlh ber chu? A huntawhin a zir loh avang ringawta misual ena an en ve chu tu nge?"