Travis Scott album thar 'Astroworld' a chhuak ta

American rapper Travis Scott chuan August 3, Zirtawpni khan a studio album pathumna 'Astroworld' chu a tlangzarh ta.

Scott hian kum 2016 khan 'Birds in the Trap Sing McKnight' album alo tichuak tawh a, a larpui hle. 'Astroworld' hi hemi hnua a album tihchhuah leh hmasak ber niin, a lar leh tawh hle. Social media lamah pawh sawi zui a hlawh hle a, fak leh selna pawh hmuh tur a tam hle. A kawppui Kylie Jenner vang ringawt pawhin ngaihven a hlawh zual hle a, a album hmasa ho aiin a lar zawk dawn niin a lang.

Tute nge a thawhpui?
Zaithiam dang te ang bawkin Scott hian a album tharah hian thawhpui a nei nual a, chung zinga langsar ber tih ngam chu The Weeknd a ni. Canadian singer bakah hian American rapper Frank Ocean leh Quavo bakah, Australian singer Kevin Parker te a tawhpui bawk. Pharrell Williams hming pawh a lang tel bawk.

Astroworld album-ah hian hla 17 zet a awm a, hla eng emaw zatah hian a thawhpuite hian a puibawm a ni.

Rapper zinga ngaihven hlawh ber pawl Scott hian kum 2016 May thla khan a album title tur hi a lo puang tawh a, kum 2017-ah tlangzarh a tum thu a lo sawi tawh bawk. Mahse a tum hunah tak a peih fel hman bik lo a, kum 2018 chawhnu herah a tichhuak ta chiah a ni.

Nikum May thla khan a albuma hla pathum - A Man, Green and Purple leh Butterfly Effect te chu chu SoundCloud lamah a lo tichhuak tawh, Kumin kum tir lam khan Kanye West leh Lil Uzi Vert te thawhpuiin 'Watch' a lo tichhuak tawh bawk.

Kylie chungchang maw?
Astroworld album-a hla ṭhenkhatah hian American rapper hian a kawppui Kylie Jenner chungchang a sawi lang zauh zauh a ni awm a, chu chu social media lama khel zui hlawh ber pawh a ni.

Stargazing, Skeletons, Wake up leh Coffee Bean hlaah te an inkar thu ṭhenkhat a chham chhuak niin an sawi. Coachella aṭanga an intawn dawn te, sawisel leh beih an tawh dan ṭhenkhat pawh a tarlang bawk.

He album hian American model Kylie vang ngawt pawhin ngaihven a hlawh a, tunlai album chhuak thar zinga thawm nei lian ber tih ngam a ni.