Kylie Jenner hausakna an sawi vawng

American model lar Kylie Jenner hi kum 20 mi lek a la ni a, mahse American hmeichhe zinga hausa ber a ni der tawh. Hei vang hian a chanchin pawh hian ngaihven a hlawh zual a, a hausak zia hi khawtlang mite pawhin hahipa an sawi a ni!

Kylie hausakna hi $mtd 900 velin chhut a ni a, sum a thawkchhuak hnem tih hairual a ni lo. 'A lar a, a larna a chhawr ṭangkai thiam bawk. Sum thawh chhuah dan a hria a, chu mi tur chuan a thawkrim bawk, tih chu khawthlang media ten a chungchang an sawi dan a ni.

Social media vangin maw?
Keeping up with the karda­shian star Kylie chuan a hlawhtlinna kawngah hian social media a hmang ṭangkai hle tih a sawi. A sum dawnna kawgah nasa takin a pui tih a sawi a, engkim a awlsam phah a ni, a ti.

Reality TV star Kylie Jenner hian Instargram lamah vawi khat post a siam aṭangin $mtd 1 zel lalut anga chhut a, follower maktaduai 111 zet a nei a ni.

Kum hnih kalta mai khan $mtd 29 vel sengin Kylie Cosmetics a din a, a sum hnar ber a ni der tawh. Kum tam a vei hmain a sumdawnna aṭang hian $mtd 630 zet a lalut tawh a, hlawkna a tel nual tawh tih a chiang! Kum 2017 chhung ringawt pawh khan $mtd 330 zet a lalut a ni.

A hlawhtlinnaah hian social media chuan kawngro thui tak a su tih hairual a ni lo a, amah ngei pawhin a sawi chhuak fo a ni. Customer tam tak chu social media kaltlanga a hmuh a nih thu sawiin, product tih larna ṭha tak a nih thu a sawi bawk.

Forbes magazine chuan Kylie Jenner hausakna hi $mtd 900 zet niin a chhut a, US khua leh tui zinga billionaire ni thei naupang ber a ni bawk. Kylie hian nikum June - kumin June thla inkarah ringawt pawh khan $mtd 166.5 zet a thawkchhuak a ni.

Kylie hian Agust 10 hian kum 21 a tling dawn a ni.