Grammy Awards 2022 sem hun an sawn

Rimawi lama zan ropui ber Grammy Awards sem hun chu Covid-19 hri thar Omicron nasa taka a hluar leh tak zel avangin sawn hlat a ni a, a hun leh ni tur erawh an la tarlang leh lo.

Recording Academy leh CBS lam chuan thuchhuah siamin January 31-a Los Angeles-a sem an tum Grammy Awards vawi 64-na chu an ruahman hun anga kalpui tur chuan 'risk' a sang lutuk niin an tarlang. A hun leh ni an la tarlang leh thuai dawn tih tarlang bawkin, music community, a hmuna chhimtu tur mipuite leh an hnathawkte himna chu an ngaihpawimawh ber a nih thu an tarlang tel bawk.

Grammy Awards 2022 nomination list hi nikum lamah khan puanzar tawh niin Jazz keyboardist Jon Batiste chuan nomination a hmu tam ber a, 11 lai a hmu. Olivia Rodrigo, Lil Nas X, Billie Eilish, Justin Bieber leh Doja Cat-te chu hming langsar zual an ni.