John Mayer-a'n hripui a kai

American guitarist leh singer ni bawk John Mayer chuan Covid-19 hripui a kai.

John Mayer-a telna band Dead & Company chuan thuchhuah siamin hemi chungchang hi an tarlang a, Mayer hi Playing in the Sand festival, Mexico-a an neih turah pawh a inlan thei dawn ta lo a ni.

Dead & Company member Bobby Weir chuan thuchhuah an siamah show chu an ṭhulh phah dawn lo tih sawiin Mayer tel loa an kaltlangpui dawn tho thu a sawi.

The Grateful Dead spin-off band hi tun kar tawp lo awm tura Riviera Cancun-a neih tur Playing in the Sand festival headline tur an ni. Mayer bakah hian an drummer Bill Kreutztmann pawh he show-ah hian a inlan thei dawn lo bawk.

Hetih lai hian John Mayer-a signature guitar thar PRS Silver Sky SE version chu January 11 hian PRS chuan an tlangzarh dawn. He guitar hi PRS Silver Sky man tlawm zawka miin an lei theih tura duan niin, tlangzarh a nih tur thu hi John Mayer leh PRS lam pawh hian an puangzar ve ve tawh a ni.