Shillong Chamber Choir dintu Neil Nongkynrih a thi

Shillong Chamber Choir (SCC) dintu leh an hotupa ber Neil Nongkynrih chu Nilaini khan Mumbai-a Reliance Foundation Hospital-ah kum 51 mi niin a thi.

Shillong Times tarlan danin Neil Nongkynrih leh a zaipawlte hi nikum September thla aṭang khan Mumbai lamah hian shooting nei turin an awm tawh a; amah hi ulcer nei sa niin tun hnai lawk khan a pum na a tih avangin damdawi-in panpui a ni a, chutah chuan emergency-a zai nghal niin a dinhmun a ṭha thei loa, a thih pui ta a ni. Vawiin lamah hian a ruang chu Shillong lam panpui a ni ang a, naktukah vui a ni ang.

India rama zaipawl hmingthang ber leh hlawhtling bera chhal ngam dintu Neil hi Meghalaya minister hlui AH Scott Lyngdoh fapa niin July 9, 1970 khan a piang a, a naupan lai aṭang tawha rimawi lama tui mi niin, kum 1988 khan Shillong chhuahsanin England lam a pan a ni.

London-a Trinity College leh Guildhall School of Music & Drama hnuaiah rimawi zir chhuakin UK velah pawh concert pianist niin, show eng emaw zatah a inlan nghe nghe. Oxfordshire lamah music zirtirtu ni ṭhin bawkin a zirlai zingah chuan khawvel huapa lar chhuak ta British band Radiohead drummer Philip Selway pawh a tel.

Kum 2001 khan India ram lamah lo kir lehin Shillong-ah piano zirtirtu a ni a, chumi kumah vek chuan Shillong Chamber Choir dinin; kum 2010-ah phei chuan a zaipawl din chu a kaihhruaina hnuaiah India’s Got Talent (Season 2) winner an ni hial.

SCC hi an hlawhtling chho hle a, khawvel huapa lar Fitz William Quartet-te nen pawh thawkhoin India rama artist langsar tak tak eng emaw zat an thawpui tawh.

Kum 2011-a Krismas album an tihchhuah phei chu India rama movie music album ni loa album hralh kal ber pawh a lo ni tawh hial a ni. ‘Vande Mataram’ an sak phei chu Indian space rocket Chandrayaan- 2 Thlaa a ṭum dawn khan an play nghe nghe.

Rimawi khawvela a hlawhtlinna hrang hrang avang leh rimawi hmanga art khawvela sulhnu ṭha tak a hnutchhiah avangin kum 2015 khan Padma Shree chawimawina hlan a ni.