Bangalore Fashion Week-ah Nunui Rualhleng

Mizo zingah profes­sional model tia chhal tur an la awm lo a ni mai thei a, hma erawh kan sawi viau. August 2-5 chhung khan Bangalore Fashion Week neih a ni a, he hunah hian model Nuni Rualhleng a inlan.

India rama Fashion Week ngaihlut ber pawl Bangalore Fashion Week hi Oterra Luxury Hotel-ah neih niin, 10th anniversary an ni nghal bawk. Nunui hi Grand Finale-a inlan model thlan chhuah 10 zingah a tel a, a che ṭha viau bawk. Dream Merchant hnuaiah modelling contract hmuin, designer ṭha bik 12 kutchhuak pholangtu zingah a tel a ni.

Nunui hian next project leh photoshoot atan contract a hmu nghal bawk. Hemi bakah hian Bhutan-a photo shoot leh show neih turah sawmna a dawng bawk.

Nunui hian Bangalore aṭangin Kolkata a pan a, mahse Kerala Fashion Week-ah tel tura sawmna a dawn avangin Kerala hi a pan leh nghal a ni.