Dua Lipa ‘Levitating’ Kum 2021-a US mipuite hla ngaihthlak tam ber

☐ Kum 2021 chhung khan US-a hla stream tam ber chu Dua Lipa ‘Levitating’ a ni a, Morgan Wallen 'Dangerous: The Double Album' chu album lar ber a ni thung. ■

Billboard-in chart hrang hrang an siamna tura data an lakna atana an thawhpui MRC chuan 2021 U.S. Year-End Report an tichhuak a, chuta ṭanga a lan dan chuan British singer Dua Lipa hla hit ‘Levitating’ chu nikum chhunga US mipuite hla stream tam ber a nih piah lamah radio-a an hla ngaihthlak nasat ber a ni bawk.

‘Levitating’ hi Dua Lipa studio album pahnihna, kum 2020-a a tlangzarh 'Future Nostalgia'-a mi kha a ni a, 'Don't Stop' hitmaker hian he hlaah hian DaBaby a thawhpui a ni. Kum 2020 October thlaa single-a an tihchhuah kha a ni a, nikum chhunga US-a hla an ngaithlak tam ber ni mah se Billboard Hot 100 lamah erawh pakhatna a ni miah lo thung. UK single chart-ah pawh pangana a ni phak chauh a, US Hot 100 chart-ah pahnihna a ni phak bawk. Chart topper ni lo mah se nikum chhung khan US-a an hla stream tam ber a ni tho.

'Dangerous: The Double Album'
Morgan Wallen-a album hit tak mai 'Dangerous: The Double Album' chu nikum chhunga US-a album lar ber a ni.

Kumtir lama a tlangzarh niin nikum chhung khan Billboard 200 chart topper a ni ngun hle a, record-te hial pawh a siampui a ni. Kum tawp a nih meuh chuan equivalent album unit maktaduai 3.226 a hmu chhuak hman niin MRC Data chuan a tarlang.

Olivia Rodrigo 'Sour' kha album EAU hmu chhuak tam ber dawttu a ni a, Drake 'Certified Lover Boy' leh Adele '30'-te chu pathumna leh palina an ni ve bawk.

MRC Data hian 2021 U.S. Year-End Report an siamna tur hian nikum January 1 aṭanga December 30 thleng khan an chhui. Nikum kha kum 10 chhunga a vawi khatna atan album hralh 11% laiin US-ah chuan a pung a, CD aiin vinyl hralh 'modern era'-a a vawi khatna atan a kal zawk bakah on-demand streaming chu 10%-in a pung bawk a ni.

EAU aṭanga teha kum 2021-a album hit zual te:-
1 Morgan Wallen - Dangerous: The Double Album 3.226 m EAU
2 Olivia Rodrigo - Sour 2.856 m EAU
3 Drake - Certified Lover Boy 1.970 m EAU
4 Adele - 30 1.936 m EAU
5 Pop Smoke - Shoot for the Stars Aim for the Moon 1.533 m EAU