Box Office-ah 'Mission: Impossible Fallout' a 'out' thei lo

North American Box Office-ah 'Mission: Impossible Fallout' nek chhuak thei an la awm lo a, kar liam ta weekend chhunga sum lalut hnem ber a ni. M:I hian $mtd 35.1 zet lalutin, a zawnin No.1 a hauh.

Tom Cruise leh Rebecca Ferguson te channa action film hian tlangzarh karah $mtd 61.5 zet lalutin pakhatna a lo hauh tawh a, a sum lakluh erawh a tlahniam. Heti chung hian khum thei an la awm chuang lo a, en hlawh leh sum lalut hnem ber a la ni fan.

M:I Fallout hi July 25 tlangzarh a ni a, tun hnai film chhuak thar zingah chuan ngaihven hlawh ber pakhat a ni. American film director lar Christopher McQuarrie kut chhuak hian khawvel a deng chhuak a, ram hrang hrangah hralh a tla hle.

India ramah pawh a hit viau a, vaibelchhe 67 chuang zet a hailut a ni.

A thleng sang!
Paramount Pictures chuan tun hnai khan special screening an buatsaih a, mi 2,000 velin an en. An chhuahna hmun hi Norway-a kham lar leh sang tak Pulpit Rock a ni a, feet 2,000 vel zet a ni!

M:I Fallout-ah hian Tom Cruise chu kham sang tak takah a che tla a, film an chhuahna hmun nen pawh hian a inang viau. Pulpit Rock chung zawlah hian screen lianpuiah mi sang telin an en a, a hmuawm dan pawh a dang ngei ang.

American actor lar Tom Cruise pawhin he thil hian a tilawm hle tih a sawi a, Twitter ah pawh a pholang a ni.

Box Office Top 10
1. Mission Impossible: Fallout - $35.1
2. Disney's Christopher Robin - $24.5
3. The Spy Who Dumped Me - $12.1
4. Mamma Mia! Here We Go Again - $15.0
5. The Equalizer 2 - $14.0
6. Hotel Transylvania 3: Summer Vacation - $8.0
7. Ant-Man and the Wasp - $6.3
8. The Darkest Minds - $5.8
9. Incredibles 2 - $4.9
10. Teen Titans Go! To The Movies - $4.7