Loudwire Best Metal + Hard Rock drummer of all Time John Bonham

Magazine hrang hrang hian musician ṭha an tihzawng hi vote hmang emaw, mi thiam­te bikte emaw ruaiin an thlang chhuak ṭhin. Online rock magazine lar Loudwire chuan Best Metal + Hard Rock drummer of all Time 66 an thlan chhuahnaah Led Zeppelin drummer John Bonham chu drummer ṭha berah an thlang.

Ṭhangthar musician tam tak chuan John Bonham hming hi an la hre lo mai thei a, an hre mai thei bawk. An hre lo a nih pawhin a awm viau, kum 1980 September 25 khan kum 32 mi lekin a boral tawh miau a. A boralna rei tawh mah se rimawi khawvelah a hming a dai tawh ngai dawn lo a, dummer zingah chuan ani aia 'legend' dang an awm chuang lo.

Kum 1948 khan Redditch, Worcestershire-ah piangin kum nga mi a nih laiin drums a vaw ṭan tawh a, Led Zeppelin vocalist Robert Plant nen khan band pahnihah an tel dun hman a ni. Led Zeppelin kan hria a, Heavy Metal scene-ah phei chuan anni anga huhang nei lian an tam lo a, a ching chhuaktu zingah pawh sawi lan an ni ṭhin. Khawvel dengchhuak khawpin an lar a, Bonham pawh hian rockstar nun a zo lo a ni ber ang chu, zu a in nasat avangin kum 32 mi lek niin a vanglai takin a thi ta a ni.

A thih ni hian darkar 24 chhungin vodka litre 1-1.4 vel lai a in a, hei vang hian a luah nasat bakah a thawk lamah har­satna a tawh phah niin an sawi.

Led Zeppelin-a an guitarist Jimmy Page khan The Yardbirds band a chhuahsan hnuah band thar a din a, Robert Plant chu vocalist turin a sawm a; Plant-a sawi hmuhnain Bonham hi Led Zeppelin drummer atan an lalut a ni. Sawizui ngai loin an chanchin hre tak tak Mizo zingah pawh an tam.

An drummer duhlai John Bonham ber a awm tak loah chuan band anga kal zui zel pawh an phur ta lo a, December 4, 1980 khan thuchhuah siamin music khawvel sawinghingtu band chuan an kehdarh thu an puang ta a ni.

Drums history sawi apianga a thiam zia sawi hmaih tawh ngai loh tur John Bonham hi a speed, power leh a bass drumming speed a chak avangte leh a groove special tak avangin drummer dangte'n an ngaisang hle.

Hard rock style-in hneh takin play ṭhin mah se funk leh latin music lam hawi groove dangdai tak tak an music-ah telh a hrat a, jazz music play thiam tak ni bawkin an jazz music pawh hi a style-ah hriat tur a awm zeuh zeuh a ni.

•    Dave Grohl, Chad Smith, Dave Lombardo leh Mike Portnoy-te influence-tu drummer a ni.

•    Rolling Stone '100 Greatest Drummers of All Time'-ah pawh No.1-ah an thlang.

•    American Online music database AllMusic Classic Rock's 2005 list of 50 Grea­test Drummers in Rock-ah pawh No.1 a ni.

•    Music magazine lar Modern Drummer chuan history-a rock 'n' roll drum­mer ropui ber niin an sawi.

1    John Bonham    Led Zeppelin

2    Keith Moon    The Who

3    Neil Peart    Rush

4    Dave Lombardo    Slayer

5    Danny Carey    Tool

6    Ginger Baker    Cream

7    Mike Portnoy    Dream Theatre

8    Bill Ward    Black Sabbath

9    Bill Bruford    Yes

10    Dave Grohl    Nirvana