John Petrucci solo album-ah Mike Portnoy
Dream Theatre guitarist John Petrucci solo album tihchhuah thar tur 'Terminal Velocity'-ah chuan an drummer hlui Mike Portnoy-in drums a vuak sak a, Dave LaRue (DIXIE DREGS) chuan bass guitar perhin a pui bawk.
Mike Portnoy hian 'Terminal Velocity'-ah Petrucci a pui tih hi Nilaini khan social media-a a post-ah a sawi a, track listing pawh a tarlang nghal. Petrucci album thar tur cover art hi Sean Mosher-Smith siam a ni a, January-ah khan Portnoy hian Petrucci thawhpui leh a chak thu leh music siam dun a chak thu hi a lo sawi tawh a, a takin a chakna chu tihhlawhtlinin a awm ta a ni.
Petrucci nen thawhdunna tur an nei mai thei hi hemi ṭum hian a sawi zui bawk a, hemi hnu rei vak loah hian an thlalak dunna pahnih lai chu social media-ah post fan-te chuan an thawkdun ngei dawn niin an lo ring lawk sa tawh nghe nghe a, Nilaini khan hei hi a rawn nemnghet zui leh a, fan-te lawmna chu an thlen ngei ang.
Petrucci nena an thawhdun lai ngaihawm a ti
Myglobalmind-in an kawmnaah pawh Portnoy hian Petrucci nen chuan thawhdun leh an chak ve ve tih a lo sawi tawh a, "Kum 25 lai team ṭha tak kan ni tawh a, Dream Theatre leh Liquid Tension Experiment-ahte co-captain kan ni ve ve ṭhin. G3 tour-ah pawh chhuahpui ngei ka duh.
"Inkungkaihna kan lo neih tawh ka thlir letin drummer-guitarist inlaichinna special tak nei kan ni. Chutiang chu Metallica-a Lars Ulrich leh James Hetfield inkarah te, Pantera-a Dimebag leh Vinnie inkarahte bakah Eddie leh Alex Van Halen-te inkarah khan hmuh tur a awm bawk. John nen hian khatiang inlaichinna bik tak kha kan nei niin ka hria," tiin a sawi.
Kan thawhdun lai kha kan ṭhat lai ber leh kan chak lai ber pawh a ni a, a ngaihawm ka ti hle. Music kan siam leh lo a nih chuan ka inthiam thei lo ang, tiin a lo sawi tawh nghe nghe.
Terminal Velocity track listing:
01. Terminal Velocity
02. The Oddfather
03. Happy Song
04. Gemini
05. Out Of The Blue
06. Glassy-Eyed Zombies
07. The Way Things Fall
08. Snake In My Boot
09. Temple Of Circadia
Eng lam hawi music nge an play dawn?
Portnoy hian Petrucci nen an thawkdun leh a nih chuan eng ang music nge ngaihthlak beisei tur chi ni ang tih zawhna a chhannaah, "Dream Theatre album hmasa 10 kha in ngaithla tawh a nih chuan, khatiang kha a nimai," tiin a sawi a ni.
Mi tam takin drummer ṭha bera an chhal hial Portnoy hian September, 2010 khan Avenged Sevenfold a tour pui laiin Dream Theatre a chhuahsan thu hi a puang a ni. Kum 30 chuang lai liam tawha duh taka an lo din Dream Theatre a chhuahsan hnu hian Extreme leh Steve Vai-te tana drums lo vaw tawh ṭhintu Mike Mangini chuan a thlak a ni.