Mizo Idol star Desy a liam ta

Mizo Idol Season 2, kum 2009-a neiha palina Desy Lalnunsangi chu Inrinni liam ta chhun dar 12:50 khan Civil Hospital, Aizawl-ah 'kal na' vangin kum 29 mi niin a thi.

Desy Lalnunsangi hi Khawhai khua niin Lalthanmawia leh Chertluangpuii-te fa pali zinga upa ber a ni a, a naupan lai aṭanga zai ngaina mi niin, Mizo Idol-a a tel ṭum pawh khan boruak nei lian ber zinga mi a ni. Sanglianthanga hla 'Jacoba Pathian; a sak phei chuan lawm a hlawh zual hle.

Mizo Idol Season 2 buatsaih a nih dawn khan Khawhai aṭangin Aizawl lam a rawn pan a, Saizikpuiii Sailo (L) te nen inchhar chhoin intihsiak chhung zawng khan anni hian an buaipui a ni. Idol intihsiaknaa a tel chhung khan lawm a hlawh a, ṭantu ngah ber zinga mi pawh a ni nghe nghe.

Desy hian LR Higher Secondary School, Khatla aṭangin Pawl 12 a pass a, chumi hnuah chuan Pachhunga University College aṭangin BA a zo leh a ni.

Kum 2020 kum tawp lam aṭang khan kal ṭhalo natna a nei ṭan a, chumi hnuah chuan SLE natna a nei tih hmuh chhuak lehin nikum December thla velah khan a bawksawp deuh ṭan a; Inrinni khan Civil Hospital, Aizawl-ah a boral ta a ni.

A damloh chhung hian Desy hian Bible vawi thum lai a chhiar chhuak a, nikum pawh khan Khawhai South Branch KṬP aṭangin Bible a chhiar chhuah avangin lawmpuina Holy Bible a dawng nghe nghe.

Young Mizo Association, Khawhai Branch leh Village Council Khawhai Joint Committee chuan Desy ruang hi ropui takin niminah khan an thlah liam tawh a, YMA member zawng zawngte'n pawn dum nen an thlah liam bakah an chenna in aṭanga thlanmual panpui a nih laiin information centre-ah a zai an play bawk.

Desy hian a fapa kum li mi Andrew Zoremtluanga a kalsan a ni.