Bollywood nghawr nghingtu Sushant Singh thihna

Indian entertainment khawvelah Sushant Singh Rajput thihna lo chuan titi a la luah phak meuh lo. Kum 34 mi actor lar hi June 14 khan, Bandra, Mumbai-a a inah inawkhluma hmuh a ni. 

'Kai Po Che' aṭanga a Bollywood career ṭantu Sushant Sing hian thla ruk chhung chu depression neiin hun a lo hmang tawh niin an sawi a, a thihna hian a fans tam takte thin tirimin puh tur an zawng - nimin khan dan hremi Sudhir Kumar Ojha chuan Bihar Court-ah thubuai thehlutin Salman Khan leh Karan Johar chu Suhsant Singh thihnaa a puh zingah a telh. 

Sushant Singh thihna hian tun hnaia Bollywood-a ṭawngkam lar tak nepotism (chhungkhat induhsakna) chu a ti lar thar leh a, Bollywood-a chhungkaw hnai induhsakna hleihluak chuan Sushant hi depression-a neihtirah mi tam takin an ngai. 

Patna, Bihar-a piang leh seilian Sushant hi middle-class chhungkua aṭanga seilian a ni a, Bollywood lamah hmelhriat sa a nei lo. Zirna lamah lehkha thiamthei tak niin Delhi College of Engineering (DTU ni ta) entrance exam-ah pasarihna ni thei a ni a, India rama engineering zirna ṭhaa lut turin engineering entrance exam 11 zet a patlang - DCE hi a thlang. 

Physics-ah National Olympiad Winner lo ni tawh a ni a, van thengreng leh boruak zirchianna lam chu a tuipui ber niin social media lama a thuziakah pawh hetiang lam hi hmuh tur a tam hle - International Lunar Lands Registry 

aṭangin thla (moon)-ah hmun a lei hial. 

Bachelor of Engineering (Mechanical Engineering) a zir laiin lemchan lamah a tui thar a, college kal chhuak loin lemchan lamah hian a lut. Bollywood khawvelah hmelhriat nei lo chungin a hming a chher hle. 

Sushant Singh hi kum 2002 khan kum 16 mi lek a nih laiin a nuin a thihsan a, a nu thihna hian a nunah nghawng thui tak a nei - a film channain hlawhtlinna an chan apiangin a nu ngaih a zual ṭhin a, hei hian van thengreng chanchin leh sakhuana khawvelah pawh a hnuk hnai lehzual hle niin an sawi. 

Tlangval ṭawng tam lo, zakzum leh ṭhian kawm tam lo tak niin an sawi a, a thih hma lawk khan zanlai pelh tawhah a bialnu Rhea Chakraborty leh a ṭhian ṭha ber Mahesh Shetty-te chu phone hmangin biak a tum ve ve a, mahse an chhang lo. 

A hnua a chanchin an hriat erawh ceiling fan-a a inawhhlum thu a ni a, Sushant thihna hian khawvel a barakhaih takzet. Tlangval a ni a, amah ngeiin, "Nula tam takin min star beiseiin engineer nih ka tum a, lemchan khawvelah engineer tam tak man phak loha tam nula ka tawng thung," tia fiamthua a sawi angin a luck em em bawk. 

Film pakhat a chanin vaibelchhe ruk chuang a hlawh ṭhin a, lungngaihna tur a nei lo - mahse, a nunna a la miau si? Engatinge? tiin zawhna a piang a, fan-ten Bollywood star lam an hawi ṭan.

Fan-ten Sushant Singh-a interview-na hlui an hai chhuak a, Bollywood chuan chhungkua anga an pawm ve loh thu a sawina te, actor lar tak tak fate zingah chuan mikhual lawm hlawh lo ang maia a awm ṭhin thu a sawina te a lo awm ṭeuh!

Bollywood khawvela star lar tak takin social media lamah Sushant thihna an tawrh thu an ziak a, a ziaktu zingah Karan Johar leh Alia Bhatt an tel - Karan hian a film tam zawkah star lar sa fate a chantir ṭhin a, Alia hi Bollywood director lar Mahesh Bhatt fanu a ni bawk. 

Karan Johar hian a show lar tak 'Koffee with Karan'-ah Alia Bhatt nen hian Sushant Singh hi fiamthu thawh nan an lo hmang tawh. Hei tak hi fan-te'n an haw thar a, a thih hnua a ui ber anga an lang leh chu 'Pharisai' tiin an sawisel. 

Indian politician lar Sanjay Nirupam chuan thla ruk chhungin Sushant Singh Rajput hian film pasarih, inremna a neihpui sa chu a hloh thu a sawi a, hei hi Bollywood-a chhungkua a neih loh vangah tam takin an ngai. 

Indian film director lar Abhinav Kashyap chuan Bollywood-ah chhungkhat laina induhsakna hleihluak a awm thu a sawi a, Bollywood-a nepotism a awm thu sawi hmasatu Kangana Ranaut pawh lo lang vatin Bollywood chu 'milem' tam takin an hual thu a sawi!

Saif Ali Khan chuan Bollywood-ah midang ngaihtuahnain hmun a chan loh thu a sawi a, star tam takin Sushant an hmangaihna thu an sawi chu lemchanna maiah a ngai. 

Bollywood-a induhsakna hleihluak, inthliarna, enhranna leh duhsak hlawh loh bikna hian Sushant chu a thih tirah mi tam takin an ngai a, an lung a awi thei lo - social media lamah Karan Johar leh star tam tak chu 'unfollow' an ni a, an film reng reng en lo tura campaign an kalpui bawk. 

Sushant Singh meuh pawhin 'depression' a nei thei a, induhsakna hleihluak chuan a nun hrehawmah a chantir - nepotism hi Bollywood mai ni lo, khawtlang, sorkar leh politics thlengin a awm a, kan hriat loh karin mi tam tak beidawnnaa hruaitu a ni thei.