Koffee With Karan kan hmu tawh dawn lo em ni?

Sushant Singh Rajput thihnain Bollywood-ah nghawng a nei lian zel a, dem hlawh ber pawl Karan Johar leh a show sawizui hlawh tak 'Koffee With Karan' chu tihchhuah a ni tawh lo mai thei niin IWMBuzz report chuan a tarlang.

Internet hmangtute chuan Karan Johar hi Nepotism chawi lartuah an puh nasa hle a, Suhshant Singh Rajput bakah hian Bollywood industry-a hmabak nei eng tak tak eng emaw zat hmalam hun tichhetuah an puh. Sawiselna nasa tak a tawh avang hian Koffee With Karan show pe chhuaktu Star World Channel chuan pek chhuah tawh lo an tum niin IWMBuzz chuan a tarlang. A tirah Star World hian channel danga sawn a tum phawt a, mahse sawiselna a nasat em avangin pek chhuah tawh lo mai a tum niin an sawi.

Report an tihchhuah­ah hian Star World hnim hnai tak hnen aṭanga thu an dawng tih an tarlang a ni. Sushant Singh Rajput thih hnuah hian Bollywood industry chu a buai nuai nuai a ni ber a, India enteratainment media-te chuan Sushant thih chungchang leh a chhehvel bak tarlan tur an hre meuh lo. Karan Johar hi MAMI film festival board aṭangin a inhnukdawk tih thawm a awm tawh bawk a, mahse hemi chungchangah pawh hian thuchiang engmah tarlan a la ni lem lo. Karan bakah hian Alia Bhatt, Sonam Kapoor, Ananya Pandey leh Sonakshi Sinha-te chu Sushant thih vanga dem hlawh zual an ni.