Full House star Bob Saget a thi

American TV sitcom Full House-a Danny Tanner lema chang ṭhin Bob Saget chu kum 65 mi niin Pathianni khan Orange County, Florida-a a thlenna hotel-ah thiin an hmu.

Bob Saget thih thu hi nimin khan a chhungte chuan puangzarin Orange County Sheriff Department lamin thuchhuah an siamah chuan ruihhlo emaw, thil dik lo eng emaw rinhleh tur a awm lem lo niin an sawi.

'Full House' (1987–1995)-ah khan Bob Saget hi episode 192 laiah a inlan a, a chhunzawmna 'Fuller House', Netflix-in an tihchhuahah pawh inlan lehin 'How I Met Your Mother'-a Ted Mosby 'voice of narrator' kha amah hi a ni bawk. Lemchan lamah sulhnu a hnut chhiah ṭha hle a, film 20 vel zeta a inlan tawh bakah TV show 40 chuangah a inlan tawh bawk a ni.