Teen Choice Award sem a ni ta

Kum tina sem ṭhin Teen Choice Award chu nimin zing khan Los Angeles-ah sem a ni leh ta, Music lamah Camila Cabello chu mi mala langsar ber niin, Avengers: Infinity War chuan movie category hrang hrang a thunun hnen viau bawk.

Music huangah chuan American-Cuban singer Camila Cabello a che ṭha hle a, Choice Female Artist atan thlan a ni. Hei bakah hian Choice Summer Female Artist leh Choice Song: Female Artist award a hum haw bawk.

English singer Louis Tomlinson chu tleirawl zingah a tlana tih a chiang a, Choice Male Artist award a dawng. Carrie Underwood chu Choice Country Artist atan thlan a ni a, Choice Electronic/Dance Artist award chu The Chainsmokers kutah hlan a ni. English singer lar Ed Sheeran, Khalid leh Korean Boy Band BTS te chuan award an humhaw ve bawk.

Movie huanga ropui ber chu Avengers: Infinity War a ni a, Choice Action Movie atan thlan a ni a, a changtu zinga mi Chris Evans leh Scarlett Johansson te chuan Choice Action Movie Actor leh Actress an dawng a ni. Black Panther chuan Choice Sci-Fi Movie award a dawng a, he film-a hnehsawh taka inlan Letitia Wright chuan Choice Sci-Fi Movie Actress a dawn phah. He tih lai hian Chris Hemsworth chu Choice Sci-Fi Movie Actor atan thlan a ni a, Choice Comedy Movie Actor award chu Dwayne 'The Rock' Johnson hnenah hlan a ni bawk.

Heng bakah hian American model lar Gigi Hadid leh tennis star Serena Williams te chuan award an dawng ve bawk.