Lirnghingin Indonesia a sawi Inches 10 velin Lombok island a san phah!

Lirnghing nat zawng tehnaa 6.9-magnitude zeta na chuan August 5 khan Indonesia-a Lombok island a sawi a, he island hi inches 10 zetin a san phah niin, scientist te chuan an sawi. He thil thleng avang hian mi 430 vel zet an thi a ni.

Khawvel ram hrang hrangin lirnghing an lo tuar tawh ṭhin a, Asia khawmualpui pawh a tuar nasa ber pawl a ni. Tun hnaia Indonesia-a lirnghing hi a na hle mai a, lei lung hmel hmang pawh a danglam dawrh a ni. Centimeter 25 zeta leilung san belh tur khawp chu a na thawkhat hle ang tih a hriat a, he thil theng hi scientist te pawhin an bengkhawn hle a ni.

Kawng hrang hrangin zirchhiana kalpui nghal a ni a, lei chhungril thlengin enfiah a ni. National Aeronautics and Space Administration (NASA) leh California Institute of Technology te chuan satellite hmangin leilung pian hmang hi an zirchiang a, lirnghing avanga a danglamna hi a lem nen an zir chiang a ni.

Indonesia hi lirnghing thlen thut theih rengna 'prone area' an tih zing a mi a ni a, vawi tam tak a lo thleng tawh bawk. Tun ṭuma lirnghing hian chenna in 68,000 vel zet a tichhia a, hliam tuar mi sang eng emaw zat an awm bawk. Mi 270,000 vel zet chu chenna tur nei loin an awm mek bawk.

Lombok island thlang lam aṭangin linghing hi a inṭan a, hmun ṭhenkhatah chuan centimetre 5-15 vel ten lei a tlahniam thung a ni. Aftershock pawh ṭum 500 vel zet a thleng a, hmun tam tak chu tlawhpawh theih lohin a awm mek.

Lombok island hi square km 4,725 vela zau niin, mi nuai 35 vel an cheng a ni. Khualzin te tlawh nasat ber pawl a nih avangin lirnghingin harsatna a thlen hi a pawi thui thei hle dawn a ni.