'Spider-Man: No Way Home'-in record thar a siam zel
North America Box Office-ah 'Spider-Man: No Way Home' bawkin sum a la lalut tam ber a, tlangzarh a nih aṭanga kar li lai a liam hnuah pawh a sum lakluh a la tam fal hle.
'Spider-Man: No Way Home' bawk!
Tlangzarh a nih aṭangin thla khat vel lai liam tawh mah se North America Box Office roreltu chu 'Spider-Man: No Way Home' bawk a la ni a, tun kar tawp liam ta chhung khan theatre 4,012-ah chhuahin $32,617,921 lai sum a la lalut.
'Spider-Man: No Way Home' hian US aṭangin $668,356,116 a lalut tawh a, US-a film sum lalut tam parukna a ni der tawh. US pawn lam aṭangin $867,500,000 zet lalut tawh bawkin khawvel pum Box Office aṭanga a sum lakluh tawh zat chu $1,535,856,116 lai a ni tawh. He film hi khawvela film siam tawh zawng zawng a zinga sum lalut tam pariatna a ni der tawh! Chu chu kar li chhung vel leka a sum lakluh a la ni zui!
Tunah hian a chhunzawmna an buaipui leh ṭan tawh niin khawthlang lam media hrang hrang chuan an tarlang leh der tawh lehnghal a, Sony leh Marvel lam pawh an phur hle niin a lang. Tunah hian 'Titanic' leh 'Jurassic World' aiin a sum lakluh a tam tawh zawk a, 'Avengers: Infinity War' erawh a la phak lo deuh thung.
'Sing 2' a la zai ring zel, beisei pha lo 'The 355'
'Sing 2' chu kar hmasa lama a dinhmun ngai, pahnihnaah bawk a ding leh a, $11,597,590 lai a lalut leh. He film hian ram hrang hrang aṭangin $190,789,575 a lalut tawh a ni.
Pathumna chu 'The 355' a ni a, film tlangzarh thar niin film star lar tak tak Penélope Cruz, Diane Kruger, Lupita Nyong'o, Édgar Ramírez leh Sebastian Stan-te inlan mah se beisei a pha loa, film review-tu lam pawhin an fak tehchiam lo. Rotten Tomatoes lamah phei chuan rating 4.4/10 chiah a hmu a, $4,621,765 chiah sum a lalut.
Film thar a awm mang lo
'The 355' bakah hian 22-na 'See for Me' chu film thar a ni a, heng film pahnih bak hi Box Office Mojo chart-ah film thar lang a awm lo. 'The 355' pathumnaa a rawn inrawlh avang hian kar hmasaa an dinhmun a tawlh thla hlek hlek tih lo chu thil thar tehchiam a awm lo.
Box Office top 10:-
1 Spider-Man: No Way Home $32,617,921
2 Sing 2 $11,597,590
3 The 355 $4,621,765
4 The King's Man $3,223,103
5 American Underdog $2,330,235
6 The Matrix Resurrections $1,843,306
7 West Side Story $1,369,974
8 Ghostbusters: Afterlife $1,115,529
9 Licorice Pizza $981,886
10 House of Gucci $616,744