Mihring lung atan vawk lung hmang!

US-a pa pakhat chu a lung thlak a ni a, a lung thlakna atan chuan vawk lung genetically-a khawih danglam an hmang.

Kum 57 mi David Bennett chu a lung atana vawk lung an hman aṭanga ni thumah pawh a dinhmun a la ṭha viau niin doctor-te chuan an sawi. Bennett hi Baltimore-ah darkar sarih zet an zai a ni. Mihring lung thlakna atan hian vawk lung hman a la ni ngai loa, tun ṭum hi a vawi khatna a ni hial.

David Bennett hian eng chena rei nge a lung thar hi a hman theih dawn hriat a ni loa, a nunna chhanna tur atana an duhthlan theih awmchhun a nih tawh avangin vawk lung hi an hmang ta niin an sawi. Zai a nih hma niin Bennett chuan,"Vawk lung hman emaw thih emaw kha ka duhthlan theih awmchhun a ni tawh," tiin a sawi a, risk sang tak ni mah se a duhthlan theih awmchhun a nih tawh thu a sawi bawk.

University of Maryland Medical Center-a thawk doctor-te chuan he transplant hi an tih theihna turin US medical regulator lam chuan ngaihhna-thiamna bik tak an pe a ni.

Nikum October thlaah khan New York-a surgeon-te chuan mihring taksaah vawk lung hi hlawhtling takin an lo thlak tawh tih sawi mah se, hemi ṭuma lung an vuahna hi thluak thi tawh, dam chhuah leh beiseiawm tawh loh a ni thung. Bennett erawh hi chuan a ṭhatchhuahpui leh an beisei a ni.