Prime Minister hlui Atal Bihari Vajpayee a thi

India Prime Minister ṭum thum lo ni tawh Atal Bihari Vajpayee chu nimin tlai dar nga pelh hret khan kum 93 mi niin a thi. All India Institute of Medical Sciences (AIIMS) chuan Vajpayee thih thu hi an puang a, ram chhung leh pawn a deng chhuak hneh hle.

Vajpayee hi Nilaini khan a dinhmun a hniam tih puan a ni a, khawl hmanga thawk tir a ni. Natna chi hrang hrang a ngah hle a, ṭhat lam a pan theih tak loh avangin India politician lar hian khawvel a chhuahsan ta a ni.

Prime Minister hlui Atal Bihari Vajpayee hi June 11 khan All India Institute of Medical Sciences (AIIMS)-ah dah luh a ni a, a hriselna dinhmun hi a ṭha lo hle. Vajpayee hi kidney tract infection, urinary tract infection leh awmna avangin damdawi-inah hian dahluh a ni a, khawl hmangin a nunna hi chelh hram hram ni mah se rei a daih ta lo a ni.

Vajpayee hi diabetic niin a kal pakhat zawk a chhe tawh a, kum 2009 khan stroke neiin a chak lo chho a, a stroke hnuah hian dementia a nei zui leh bawk.

Polictian langsar tak takin an ui thu an sawi a, Prime Minister Narendra Modi chuan India-in Vajpayee a chan chu pawi a tih thu a sawi. Nimin zing lam khan BJP hruaitu langsar tak tak–Amit Shah, JP Nadda, Venkaiah Naidu leh leh Union ministers Rajnath Singh te pawhin ui thu an sawi ve bawk.

A sunna leh vui hun tur hi he thu buatsaih lai hian kan hre hman lo.