Kerala : PM-in chhawmdawl hna chak zawka kalpui turin ti

Kerala state-a ruahsur nasa tuilian leh leiminin chhiatna a thlena thi chu mi 79 an tling tawh. Prime Minister Narendra Modi chuan Defence Ministry hnenah tuilian tuarte chhanchhuah leh chhawmdawl hna thawk mek chu chak zawka kalpui turin a ti.

August 8 aṭang khan Kerala hian ruahsur nasa avangin tuilian an tuar a, ruah a la sur chhunzawm reng a, khaw chin zirtute chuan Inrinni thlengin a la sur dawn niin an sawi.

PM Modi chuan nimin khan Defence Ministry hnenah chak zawka hma la turin a hrilh a, Kerala Chief Minister Pinarayi Vijayan pawh hi an state chhung dinhmunte a sawipui a ni. PM chuan Kerala mipuite himna tura an ṭawngṭai sak thu a sawi bawk.

Union Home Minister Rajnath Singh pawhin Kerala tuilian tuarte ṭanpui hna thawk turin sorkar laipui chuan NDRF team a tirhbelh thu a sawi. Kerala CM nen pawh a inbepawp reng tih sawiin, sorkar laipui chuan a theih anga puih zel a tum a ni, a ti.

Cochin International Airport runway pawh tuilianin a chim avangin airport hi Inrinni thleng hian khar a ni dawn bawk

Tuilian vanga sawnchhuah, mi nuai 1.5 chuang chu state chhung hmun hrang hranga relief camp siamah an khawsa mek a ni. Hmun tam takah power supply, inbiakpawhna leh tui thianghlim semchhuah hna pawh a buai bawk.

Congress president Rahul Gandhi pawhin tuilian tuarte ṭanpuina turin mipuite chu chief minister relief fund-ah an theih ang ang thawh turin a ngen. Midangte ṭanpui tura thawhchhuah a hun tih sawiin, PM Modi hnenah pawh chhanchhuah leh chhawmdawl hna thawk tura Army leh Navy tam zawk tir tura a ngen thu a sawi.

Chief Minister Vijayan chuan nimin khan press conference neiin, kumin May 29 aṭang khan an state chhungah ruahsur nasa avanga chhiatna hrang hrang thlengah mi 256 an thi tawh niin a sawi. Ruah a la sur chhunzawm reng avangin Periyar leh Chalakudy lui te chu an la lenbelh zel a, hei vang hian heng lui bul km 1 biala chengte chu rang taka hmun him lama insaseng turin a ti. Kuttnad bialah pawh tui hi a la lenbelh dawn nia a lan thu a sawi bawk.

Vijayan chuan sorkar laipui leh state sorkar chu tuilian tuarte ṭanpui hna thawhna kawngah an thawhdun zel thu a sawi a, sorkar chuan state chhung hmun hrang hranga chhiatna thleng vanga tangkhangten an biakpawh theihna a siam thu sawiin, 1077-ah biain reveneu department chuan an awmna chin a lo chhui zel dawn a ni, a ti.