'Queen of Soul' Aretha Franklin-i'n fam a chang ta

'Queen of Soul' an tih mai American singer Aretha Louise Franklin chu Ningani khan kum 76 mi niin a thi a, music khawvelin mi ropui a chan leh ta. Aretha Franklin hi a chenna Detroit-ah a thi a, pancreatic cancer vanga thi niin an sawi.

Kum 1960 chho vel kha Aretha Franklin lar vang lai niin, a hla zingah - Do Right Woman - Do Right Man, Think leh Chain of Fools te chu a larzual an ni. Mi tam tak chuan 'Queen of Soul' tiin an sawi ṭhin a, chu chu khawvelin a pawm dan pawh a ni.

Billboard chart hrang hrangah pawh a lang hnem hle a, Grammy Award a dawng tawh bawk. Kum 1987 khan Rock & Roll Hall of Fame-ah lakluh niin, 1994 khan Lifetime Achievement Award hlan a ni leh bawk.

US president lakluh dawnna pre-inauguration concert-ah vawi eng enaw zat a lo zai tawh bawk. Chung zingah chuan Jimmy Carter (1977) leh Bill Clinton (1993) te pawh a tel a, kum 2009-a president atana Barack Obama lakluh a ni dawn pawh khan a perform bawk.

Aretha Louise Frank­lin hi kum 1942 khan Memphis, Ten­nessee-ah a piang a, kum 2017 thleng khan mipui hmaah a la inlan a ni.