September 1-ah TSAY Songsters Competition final

India Eastern Territory huamchhunga Corps 23 telna 'TSAY Songsters Competition' chu neih chhoh mek zel a ni a, Inrinni zan khan top 10 result hi IET YouTube channel-ah Capt. Lalrin­puia, TYS chuan a puang a ni. Territorial Salvation Army Youth (TSAY) Council buatsaih he zaipawl intihsiaka top 10 lut te hian September 1-ah final an hmachhawn ang.

TSAY Songsters Competition hi August 14 khan ṭan a ni a, Corps hrang hranga SAY member ten intihsiak an hmachhawn. Judge te hi music lama Salvation Army chhuanvawr - Isaac Lalthanmama, Kolasib Corps; Immanuel MS Fanai, Territorial Staff Band Deputy Band­master; MS-a, William Booth School of Music principal leh JK Dawng­zuala, Luangmual Veng­thlang Corps te an ni.

He Songsters Com­petition-a pakhatna hian Rs.1,00,000/- an dawng dawn a, trophy leh citation hlan tel an ni bawk ang. Pahnihna leh pathumna ten Rs.50,000/- leh Rs.30,000/- bakah trophy leh citation an dawng dawn bawk. Top 10 chin te hi chu kut ruakin an haw dawn lo a, pawisa fai leh citation an dawng vek dawn a ni.

September 1 zanah final neih a ni ang a, September 2, Pathianni zanah Aizawl Temple Corps-ah result puanna leh lawmman semna inkhawm neih a ni ang.