Sangkimi Khiangte hun a her chhuak ta

Hla ṭha tak a tichhuak a, Ṭhazual chart-ah pawh a lang zing viau. Sangkimi Khiangte hun a herchhuak ta a, 'In tel lo chuan' tih hla hmang ngeiin dinhmun sang ber a luah.

Sangkimi Khiangte hian kum laihawl khan he hla hi a tichhuak a, YouTube lamah en tur a awm bawk. A thluk a mawiin sakpui nuam tak a ni a, No.1 hauh pawh hi a phu hle a ni. Tunlai lengzem hlaah chuan sakpui hlawh ber pawl a ni a, thlan hlawh ber a ni mek bawk.

A music video pawh hmuh a nuam a, Thenzawl leh a chheh vel hmun mawi tak hmuh tur a awm. Video hi Chiangtea Videography kutchhhuak a ni a, a hla hi Zawma JT Production phuah a ni thung. Sangkimi hian chart hmasa lamah khan pahnihna a hauh renrawn a, tun ṭumah erawh a hun a inher chhuak ta a ni.

Chart-a pahnihna chu Aziri ani a, 'Hmangaihna' a kal tluang zui zel. Aziri pawh hi chart-ah a lang rei ta hle a, dinhmun sang ber luah turin pen khat chiah a mamawh tawh.

Zorinzuali Khiangte chuan 'Min hnawl si maw' tih hla hmangin pathumna a luah a, Davis Lalremruata leh Hlimhlimi te chu top 5-ah an lang bawk. David-a hian a hla hit 'Jerusha' hmangin No.1 a lo hauh tawh a, Hlimhlimi pawh hian 'Ṭhian rinawm' hmangin pakhatna a lo luah tawh bawk.

Josephine Lalawmpuii chuan a hla thar 'Duhaisam Di' tih hmangin hmun lailum a chang a, Jenny Jathang hmel hmuh tur a awm ve leh bawk. Chart-a mikhual lo tak DJ Lalvenhimi leh Marina Varte te chu top 10-ah an lang bawk a, Noel Hrahsel chuan Aw 'D' tih hla hmagin hnu a khar thung.

Hontrade International
Ṭhazual Lengzem Top 10
1. Sangkimi Khiangte - In tel lo chuan
2. Aziri - Hmangaihna
3. Zorinzuali Khiangte - Min hnawl si maw
4. Davis - Jerusha
5. Hlimhlimi - Ṭhian rinawm
6. Josephine Lalawmpuii - Duhaisam Di
7. Jenny Jathang - Tuar thiam rawh
8. DJ Lalvenhimi - A pawi emai
9. Marina Varte - All In
10. Noel Hrahsel - Aw 'D'