Ariana Grande a insum zo lo!

American singer Ariana Grande chuan Manches­ter-a concert a neih ṭuma vanduaina rapthlak tak thleng kha a la theihnghilh lo a, a ngaituah let ringawt pawhin a biangah mittui a la luang. Tun hnaia a interview-ah he vanduaina thleng chung­chang hi a sawi chhuak a, a insum zo lo leh!

American media executive pakhat Ibrahim 'Ebro' Darden chuan Manchenster thil thleng chungchang hi a sawipui a, Grande a insum zo lo. 'No Tears Left to Cry' singer chuan, "Kha thil thleng rapthlak tak kha pawi ka ti tak zet a, ka ngaituah let chang apiangin ka inthiam lo ṭhin. Mi tam takin nunna an chan a, hliam tuar leh nunna chan chhungte ka tawrhpui tak zet a ni," a ti. Kha vanduaina thleng avang khan amah ngei pawh a inthiam thei lo tih a sawi bawk.

Pop singer Ariana hian nikum May thla khan Manchester Arena, United Kingdom-ah concert a nei a, mipuiin stadium an chhuahsan laiin thihchilh bomb a puak a ni. He bomb puakah hian a tipuaktu nen mi 23 an thi a, hliam tuar ṭhahnem tak an awm bawk. He thil thleng avang hian Arina Grande pawh hian rilru lamah harsatna a tawh fo thu a lo sawi chhuak tawh a ni.