Zaninah BCM music video album release dawn

Baptist Church of Mizoram (BCM) Electric Pastor Bial Zaipawl, Lung­lei te chuan an music video album ‘Kan Lungpui Lal Isua’ tih chu zanin hian Convention Centre, Lung­lei-ah release a ni dawn.

He music video album-ah hian hla 13 a awm a, an hla 13 zinga hla 12 te hi hla thar niin, an conductor, PC Lalchunglura kutchhuak mawi tak takte an ni. Worship song leh contemporary piah lamah sacrament service-a sak tur hlate leh missionary tirchhuaha sak chi hla te a ni hlawm. An hla te hi genre hrang hrang lawrkhawm a nihna hian a tihlu zualin, ngaihthlak leh en manhla tak tur a ni.

Video shooting pawh Mizorama hmun mawi leh nalh tak takah neih niin, videography lama hnuhma nei ṭha Mapuia, Leitlang Pictures leh Peter Video production (Rp-a) te kutchhuak a ni.