One in Christ-in an term thara An hla hmasa ber an tichhuak dawn

Mizo gospel group lar ber pawl leh zai tura sawm hlawh ber pawl One in Christ chuan kumin term thar (2022)-a an hla hmasa ber tur 'Isua hnenah chauh' tih chu an tichhuak dawn.

'Isua hnenah chauh' music video hi Zonet lama tihchhuah turin an dahlut fel tawh a, naktuk zak dar 6-ah hian One in Christ YouTube channel lamah duh hun huna thlira ngaihthlak theih turin an chhawp chhuak tawh dawn a ni. He hla hi B Lalremkima phuah a ni a, K. Zohmingliani'n thiam tak leh mawi taka a lo sak tawh ṭhin kha niin One in Christ lam hian an rawn thar thawh ve leh dawn a, ngaihthlak a manhla leh viau ang.

One in Christ hi an term tharah hian an member pahnih Zothasangi leh Lawmsangkimi te chuan an chawlhsan ve ta a, member thar pahnih- Lalthanzami (Tlangnuam South) leh PC.Malsawmtluangi (Venghlui) -te chuan telpui ve leh chiah thungin tuna an music video tharah pawh hian an member thar pahnihte hmel hi kan hmu tawh dawn a ni.

Instagram lama OiC follow-tute chuan an music video thar tur teaser an dah chhuah pawh an hmu tawhin a rinawm a, an hla thar hi an sa mawi dawn tih a chiang a; music video pawh hmuh a nuam dawn tih a chiang bawk. OiC zai ngainatute tan chuan 'Isua hnenah chauh' music video hi thlira ngaithlak manhla tak tur a ni.

One in Christ 2022 Term memberte:-

- Alvin Lalruatfela, Leader

- Malsawmtluangi Hrahsel, Asst.Leader

- Christina Vanlalnghaki, Secretary

- Zomuansangi Pachuau, Venghlui

- K.Lalchhuanawmi, Laipuitlang

- PC.Malsawmtluangi, Venghlui

- Lalthanzami, Tlangnuam South