'The Flight Attendant’ Season 2-ah Sharon Stone kan hmu dawn

HBO Max 'The Flight Attendant' season 2-ah Sharon Stone kan hmu dawn a, The Big Bang Theory star Kaley Cuoco nu lemah a chang dawn.

Kaley Cuoco role Cassie Bowden nu Lisa Bowden lemah Sharon Stone a chang dawn tih hi Cuoco pawh hian a tichiang tawh a, social media lamah a phur tawh thu a tarlang nasa hle. 'The Flight Attendant’ Season 2-ah hian Zosia Mamet, Griffin Matthews, Deniz Akdeniz leh Rosie Perez-te pawh an inlan leh dawn a, kumin nipuiah hi chuan Season 2 hi tihchhuah hman an tum a ni.

Season hmasaah khan episode pariat awmin HBO Max-ah kum 2020 kum tawp lamah khan tihchhuah ṭan a ni a, film review-tu lamin an fak a, Rotten Tomatoes-ah pawh rating 7.57/10 lai a hmu nghe nghe. TBBTH aṭanga kan hriat lar Kaley Cuoco chevel an fak lehpek a, he series entute hian a chevel an hlimpui leh viau.