Avril Lavigne album thar tur 'Love Sux'

Canadian singer Avril Lavigne chuan February 25 hian a studio album pasarihna tur 'Love Sux' a tlangzarh dawn ta.

Kum 37 mi 'Sk8ter Boy' hitmaker hian kum 2019 khan a studio album parukna 'Head Above Water' tlangzarhin chumi hnuah chuan album dang a la tichhuak leh loa, 'Love Sux' hi a tihchhuah leh hmasak ber tur niin hla 12 a awm dawn a ni.

A album thar tura a hla dah tur zingah hian thla hnih vel liam taa single-a a tihchhuah 'Bite Me' leh nimina audio leh lyric video a tihchhuah, Blackbear a thawhpuina 'Love It When You Hate Me'-te pawh kha a tel. Avril hian a album thar turah hian zaithiam dang a thawhpui nual dawn tih a lo sawi tawh a, tunah track list tichhuak tawhin a sawi lawk tawh angin artist dang hming hmuh tur a awm nual. 'Bois Lie' tih hlaah chuan Machine Gun Kelly a thawhpui dawn a, 'All I Wanted'-ah Blink-182 Mark Hoppus hming a lang bawk.

'Girlfriend' hitmaker hi a album tharah hian a rawn lar chhuahna pop-punk lamah a let leh dawn a nih hmel a, Blink 182 drummer Travis Barker-a DTA Records kaltlanga a tlangzarh tur niin Avril hian Barker hi thawhpui nuam a tih thute pawh a lo sawi tawh nghe nghe.

"Blink 182 hi ka band ngainat ber zinga mi an ni a, ka career pumah hian Travis hi ka ngaisang ṭhin hle. 'The Best Damn Thing'-ah kan thawkdun a, kha album pumpuiah khan drums min vuak sak a ni.

"Chutichuan tunah chuan Travis hian a produce dawn a, hla kan phuah dun a, studio-ah pawh hun ṭha tak kan hmang dun a ni. Tunah chuan DTA Records-ah ka sign tawh a, chu chu a label niin, ka tihtur awm reng pawh niin ka hria," tiin Avril chuan Travis thawhpui nuam a tih thu a lo sawi tawh.

'Love Sux' track listing:-
1. 'Cannonball'
2. 'Bois Lie' (ft. Machine Gun Kelly)
3. 'Bite Me'
4. 'I Love It When You Hate Me' (ft.blackbear)
5. 'Love Sux'
6. 'Kiss Me Like The World Is Ending'
7. 'Avalanche'
8. 'Déjà Vu'
9. 'F.U'
10. 'All I Wanted' (ft. Mark Hoppus)
11. 'Dare To Love Me'
12. 'Break Of A Heartache'