Brooke Ligertwood hla thar 'A Thousand Hallelujahs'

Pathian fakna hla Pathianin a hman tak 'What a Beautiful Name' phuahtu leh thiam taka satu, Hillsong-in Grammy Award hial pawh an lo dawn phahna Brooke Ligertwood chuan single thar 'A Thousand Hallelujahs' a tichhuak.

Brooke Ligertwood hian Zirtawpni khan a hla thar hi live video nen a tichhuak a, Capitol CMG nena an thawhdun hnua a single tihchhuah hmasak ber niin a solo album thar tur 'SEVEN'-ah a dah tel nghal dawn a ni. Brooke Fraser tih hmingpuin solo album a tichhuak nual tawh a, SEVEN hi a studio album pasarihna tur a ni tawh a, Hillsong Worship-ah Worship leader pawimawh tak ni bawkin Hillsong-ah hian kum 2005 aṭang khan a tel tawh a ni.

Ligertwood chuan,"A Thousand Hallelujah hi Kohhran tana worship hla a ni tawp mai. A bulṭhut leh a kawng ropuina lawmna hla, Krista hnena ropuina hlan let lehna hla a ni," tiin a hla thar chungchang hi a sawi.

A album thar tur SEVEN-ah hian worship hla thar ṭha tak tak a awm dawn a, kan la ngaihthlak ngai lo, a pasal Scott, a album co-producer Jason Ingram, Pastor Steven Furtick, Brandon Lake leh Phil Wickham-te hla phuah pawh a dah tel dawn bawk. Tunlai worship movement lian tak tak Hillsong, Bethel leh Vineyard musician-te'n an pui a, February 25 hian tlangzarh a tum.

Tuna a hla thar tihchhuah pawh hi a pasal Scott Ligertwood leh Gospel singer lar ber zinga mi Phil Wickham-te nena an phuah ho a ni.

Hillsong hla lar tak tak- 'Hosanna', 'Who You Say I Am', 'King of Kings', leh 'Awake My Soul' te sa lartu Brooke Ligertwood hi New Zealand mi a ni a, kum 2003-ah daih khan a studio album hmasa ber chu tichhuak tawhin an ramah chuan heng hunlai pawh hian a lar tawh rem rem hle a, an ram chart-ah a album hmasa ber 'What to Do With Daylight 'hi No.1 a nihpui nghal a, vawi sarih lai platinum-ah an puang tawh nghe nghe. Hillsong a zawm hmain John Mayer leh English rock artist David Bowie-te pawh a lo tour pui tawh a ni.