Whitney Houston ‘I Will Always Love You’ RIAA-in Diamond certified hlaah puang

Recording Industry Association of America (RIAA) chuan Whitney Houston-i'n Dolly Parton hla a sak ‘I Will Always Love You’ chu Diamond Certified a nih thu an tarlang.

RIAA hian album leh single hlate chuan streaming leh an hralhna aṭanga equivalent unit maktaduai 10 US-a an hmuh chhuah tlin chuan 'Diamond'-ah an puang ṭhin a, chu chu platinum vawi 10 nen a inhen chiah a ni.

Zaithiam fam ta Whitney Houston hian album pathum lai chu "Diamond certified' a lo thlenpui tawh a, single-ah erawh ‘I Will Always Love You’ hi a hmasa ber a ni. He hla awmna album 'The Bodyguard soundtrack' erawh vawi 18 'Platinum'-a puan a ni tawh thung.

Houston hi zaithiam hmeichhe zinga diamond-status single leh album nei thei pathumna chiah a la ni a, Mariah Carey leh Taylor Swift-te chuan he dinhmun hi an lo thleng tawh a ni.