MÖTLEY CRÜE bassist NIKKI SIXX-a'n Kum 19 ruihhlo a nghei tawh

Motley Crue bassist Nikki Sixx chuan ningani khan zu leh drugs tel loin kum 19 hun a hmang tling ta a, hemi lawmna atan hian social media-ah post a siam a, ruihhlo tel loa hun a hman chhung, darkar nen lamin a tarlang.

Kum 61 lai ni ve tawh Nikki Sixx chuan kum 19, thla 18, ni 6,941, darkar 166,565 ruihhlo tel loin a khawsa tawh tih tarlangin, zu leh ruihhlo tel loa nun a hman theihna atan 12-Step program a hman ṭangkai thu a sawi. "Kum 19 chhung nitin lawmna ka chhar...Theihtawp chhuaha i bei a nih chuan kawng zawh manhla tak a ni. Tawnhriat lo ngah tawhte chu min kaihruaitu turin an awm a, mahse ruihhlo sim tirte chu he program mawlmang tak atan hian thilpek ropui ber an ni. Ni e, thil awlsam tak chu a ni lo. Ka tih hmasak ber leh ka chhunzawm zel chu ka nun atana mi ṭha lote kalsan a ni a, chumi zawh hnuah chuan zalenna a lo awm a ni (Chumi atana i thawk a nih chuan). Ruihhlo ngawlvei kher lote pawhin nun nawmna atan 12 step program hi an hmang thei. Ka nun atan chuan program pawimawh a ni. Mi ṭha zawk, pa ṭha zawk, pasal leh ṭhian ṭha zawk, band mate ṭha zawk ka nih phah. #SoberBirthday I LOOK UP EVERYDAY AND SAY THANK YOU" tiin social media-ah a ziak.

Sixx hian kum tam takin ruihhlo vangin a talbuai a, kum 1987-ah phei chuan heroin ovedose vangin thia puan a ni hman. Minute hnih lai a lung phu a awm lo hman a, hemi hnu hian ruihhlo nghei tumin nasa takin a bei zui a, recovery 'program'-ah nasa takin a tel phah a ni.Motley Crue member-te hi an che bawraw ve ṭhin hrim hrim a, Singer Vince Neil chuan kum 1984 khan zuirui chunga motor a khalh avanga an chetsualnaah Hanoi Rocks drummer Nicholas "Razzle" Dingley a thih phah a, hemi vang hian kum 15 lai tan inah a tan phah.

Rockstar life tih kan sawia kan mitthlaa lo lang ber chu zu, ruihhlo leh mipat hmeichhiatna lam a ni ngei ang. Chu nun chu khawhtlang milarte pawh khuan an zo lo ṭhin hle a, mi tam takin kum naupang takin mual an liam phah nghe nghe. Chutiang a nih mek lai chuan milar tam tak chuan ruihhlo hi hlimna a ni lo tih an hrechiang em em a, bawraw tak taka nun hmang ṭhin, ruihhlo sim ta pawh an tam tawh hle. Chung mite chuan an ruihhlo sim ni uluk taka chhinchhiahin a champha a lo thlen apiangin midangte tihhmuhna atan leh an lawmna entirna atan chhuang takin an tarlang ṭhin.