Spice Girls-te'n reunion tour nei dawn

English pop girl group, Spice Girls chuan reunion tour an nei dawn tih a chiang ta a, chutih rual chuan an member Victoria Beckham erawh a tel dawn lo thung.

Khawthlang media te chuan Spice Girls hian UK-ah tour an nei dawn a, inremna pawh siam fel a ni tawh niin an sawi. Tour hi kuminah an ṭan hman dawn lo thung a, nakkum lam nghah a ngai dawn. An tour neih ṭan hun tur hi tarlan a la ni lo a, Mel B, Melanie C, Geri Halliwell leh Emma Bunton te chu Victoria Beckham tel loa an chet tlat a ngai dawn a ni.

UK-ah hian show ṭum 13 an nei dawn a, Wembley Stadium-ah pawh zan thum an concert dawn a ni. Tour ṭang hian member pakhat hian £mtd 12 zel an hlawh dawn a, contract pawh ziahfel a ni tawh bawk.

Spice Girls hi an kehdarh hnuah inzawm khawm leh tura duhtu an tam hle a, reunion chungchang hi sawi rik a ni zing hle. Kum 2007 khan Spice Girls hming hian tour an lo nei tawh a, 2012 London Olympics closing ceremony-ah an inlan bawk. Hemi hnu hian an reh ta vang vang a, tunah erawh chanchin thar an rawn nei ve leh ta a ni.