Hontrade Internationa Ṭhazual Fakna ; Dam chhunga rawngbawl tura inpe Judith-i a thiam ber

Dam chhunga Pathian rawngbawltu ni tura inpe, Judith Lalremruati chuan Hontrade Internationa Ṭhazual Fakna chart-ah pakhatna a hauh. Durtlang nula Judith-i hian 'Kan famkimna' tih hla hmangin No.1 hi a hauh a ni.

'Kan famkimna' tih hla hi Henry Lalmawizual phuah niin, Judith-i hian thiam takin a sa a ni. Music video hi July thla khan tichhuah a ni a, Ṭhazual chart-ah pawh a lang zing hle. Zawi zawia hma sawnin dinhmun sang ber hial a rawn luah ta a ni. Video hi RDS Shots kutchhuak a ni a, hmuh pawh a nuam hle.

Judith Lalremruati hi Pathian kohna chhangin rawngbawltu atan a inpe a, tunah hian Salvation Army Officer Training College-ah a training mek a ni.

Tun ṭum chart-ah hian Mizo Idol aṭanga Zoram mipuiin kan hmelhriat Thawhlehnaniropuia chu pahnihna a ni a, 'Khawngaih Chhandamna' hla nen hma a sawn zel. Mawitei Ralte chuan 'Nghilhni I awm lo' tih hla hmangin pathumna a hauh a, top 3-ah hmeichhia an langsar zawk.

'Lalpan a pui ang che' tih hla thiam taka satu Fel­feli Ralte chu top 5-ah a inhlangkai a, Amtea Chhak­­chhuak a inlar ve leh bawk. Chart-a No.1 lo hauh tawh Amtea hian 'Adonai Ropui Ber ' tih hla chu a hlawhtlinpui zui zel a, top chart-a lang thei hla pahnih nei thei a nih avangin dahhniam theih a ni lo.

Amtea ang bawka din­hmun sang ber lo luah tawh Ruthi CVL Muanpuii chu 'Chenchilhtu Thlarau Thianghlim' hla nen kan hmu leh bawk a, parukna a ni.

Top 10-ah hian Govt. Complex KṬP Female Voice, PC Vanlalhriati (Tenu-i) leh One in Christ te an lang ve leh bawk.

Hontrade International Ṭhazual Fakna Top 10
1. Judith - Kan famkimna
2. Thawhlehnaniropuia - Khawngaih Chhandamna
3. Mawitei Ralte - Nghilhni I awm lo
4. Felfeli Ralte - Lalpan a pui ang che
5. Amtea - Adonai Ropui Ber
6. Ruthi CVL Muanpuii - Chenchilhtu Thlarau Thianghlim
7. Govt. Complex KṬP Female Voice - Lalpa Tan
8. PC Vanlalhriati (Tenu-i) - Ka hria asin
9. One in Christ - Lalpa phut
10. Amtea - Engkim ka hlan a che