Linkin Park an comeback hnai

Hun eng emaw chen an reh hnuah American rock band lar Linkin Park te chu music khawvelah an comeback leh hnai tawh niin, an band member Mike Shinoda chuan a sawi.

Mike Shinoda hian a bandmate te nen intuai thar leh chungchang an sawiho leh tawh niin a sawi a, an kir leh hun tur erawh a la chiang lo thung. Mike Shinoda hi tun hnai khan Leeds Festival-ah a inlan a, an member famta Chester Bennington zahna a a hlan. Hemi hnu hian an band chungchang hi a sawi zui a, fan te tan chuan thu lawmawm tak a nih ngei a rinawm.

Linkin Park front man Chester Bennington hi nikum July thla khan a boral a, hei vang hian an band pawh an buai phah hle. Linkin Park co-founder Mike Shinoda chuan engtiangin nge an kal zui zel dawn an la rel fel loh thu a lo sawi tawh a, "Band angin kan kal zui zel thei angem tih zawhna kan dawng fo a, chhan a harsa hle a ni" tiin a lo sawi tawh bawk.

Zawhna tam tak an dawn ṭhin hi hun rei lo teah a chhanna a awm dawn niin a lang ta a, Linkin Park hi kan hmu zui zel a nih pawhin a mak lo ang.