Ṭhazual Lengzem ; Rebecca Lallawmsangi 'Zinkawng' a ngaihnawm ber

Ṭhazual Lengzem chart-ah Rebecca Lallawmsangi 'Zinkawng' chu pakhatna a ni a, Siampuii Ralte 'Sawisel bo' chu pahnihna niin Latei Hringngen 'A ṭha vek e' chu pathumna a ni.

'Zinkawng' ngaihnawm chu
Tunhnaia Mizo lengzem singer lawm hlawh ber pawl Rebecca Lallawmsangi hla thar ber 'Zinkawng' hi chart hmasaah khan pahnihna a ni a, tunah chuan chart topper ni tawhin hetiang dinhmuna a ding hi a mak lo.

'Kan khua' hmanga Mizo hla music video YouTube-a thlirtu tam ber record hial pawh lo siam tawhtu Rebecca-i hian nikum October thlaah khan 'Zinkawng' hi a tichhuak a, he hla hi 'Kan khua' phuahtu 'Peka Fanai' phuah bawk kha niin Reuben Lalmalsawma chuan a music video a siam sak a ni. A tihchhuah aṭangin thla li vel chiah a la liam tihah YouTube lamah thlirtu mtd. 1.3 chuang a nei leh der tawh! Mizo music video-ah chuan thlirtu ngah chak pawl tak a ni leh ngei ang.

Ṭhazual chart-a a lanna pawh a rei leh tawh a, topper hial a ni thei hi phu ti lo an awmin a rinawm loh a, chart leha a dinhmun tur hriat a chakawm tawh viau mai.

Pahnihna leh pathumna sawi ang
Ṭhazual Award 2021-a Best New Artist Lengzem award dawngtu Siampuii Ralte hla thar ber 'Sawisel Bo' chu pahnihna a ni a, he hla pawh hi a mawi a, Siampuii a zai thiam bawk nen chart topper a la nih thuai a rinawm.

Pathumna chu Latei Hringngen 'A ṭha vek e' kha ni thungin, he hla pawh hian YouTube lamah thlirtu a ngah tawh a, tunhnaia Mizo hla ngaihthlak hlawh ber pawl a ni tih a chiang.

Chart-a lang hla dangte chu
Marina V Varte 'Aw Valmawi' chu palina a ni a, Mood Station chuan 'Suangtuah hmun' hmangin top 5 an khar.

PC Lalnunpuii, Lalnunsanga, Pca & Rka, Lilzo & David Mawia Chhakchhuak-te bakah HT Lalthanzami-te chu chart top 10-ah hian an lang bawk a ni.