Spider-Man Comic phek khat $mtd 3 chuangin hralh!

Sky News-in an tarlan dan chuan Texas-a auction house pakhat-Heritage Auctions chuan kar hmasa Ningani khan Spider-Man comic 1984 issue-a phek pakhat chu $mtd 3.36-in an hralh!

He comic phek man to tak hi Marvel Comics' 'Secret Wars No.8' phek 25-na a ni a, comic artist Mike Zeck-a lemziah niin Spider-Man suit dum lanna hmasa ber phek a ni nghe nghe a. Venom lanṭanna tak tak pawh a nih thu Heritage Auctions chuan an sawi bawk.

Spider-Man comics hi comic book legend Stan Lee leh Steve Ditko-te'n kum 1962-a an tihchhuah a ni a, tunah chuan comics mai bakah animated series leh film-te hial pawh siam tawhin, Spider-Man film thar ber phei chu khawvela film siam tawh zawng zawng zinga hlawhtling ber pawl a ni hial tawh.