Black Panther 2 - Tunkarah chan chhunzawm leh tawh dawn

'Black Panther: Wakanda Forever' production chu hun eng emaw chen chawlh lailawk a nih hnuah tunkar chhung hian chan chhunzawm leh a ni dawn tih khawthlang media-te chuan an tarlang.

Guyanese-a piang, British actress Letitia Wright a inhliam vanga Nikum November thlaa film chan lai an chawlh lailawk chu an chhunzawm leh dawn ta tih The Hollywood Reporter chuan a tarlang hmasa a, chumi hnuah chuan media hrang hrangin an tarlang ve leh bawk.

Black Panther T’Challa farnu lema chang Shuri hi nikum August thla khan a inhliam a, London lamah a inenkawl zui a ni. Hemi hnuah hian Shuri tel lo hian an theih ang chen chen an chan chhunzawm leh a, mahse November thla khan prodcution chu loh theih loin an chawlhsan lailawk a ngai ta a ni. Kar hmasa lam aṭanga chhunzawm leh tur kha an ni tawh zawk a, mahse crew ṭhenkhatin Covid-19 an kai avangin tunkarah hian an chhunzawm thei dawn ta chauh niin an sawi.

Chadwick Boseman cancer vanga a boral avangin Wright 'Shuri' hi a changtu ber a ni tawh dawn a, ruahmanna an siam danah chuan kumin November 11-ah hi chuan tlangzarh hman an tum a ni.