Zaninah top 10-a tling a hriat dawn

Zonet buatsaih Mizo Idol Season 6-ah mi 25 an la dam a, amaherawhchu zaninah lak bo ṭhenin an awm dawn. Zaninah top 10 lut tur a chiang dawn a; hetih lai hian Jonathan Lalengzauva chuan a ke leh lamin top 10 a rap der tawh!

Tlin or tlak zan?
Nilaini leh Ningani zan khan top 25 intihsiak neih a ni a, zaninah result puan a ni dawn. Top 25 aṭang hian top 10-ah tute nge inhlâng kai leh dawn tih chu zaninah a hriat dawn.

A lan dan aṭang chuan a tam zawk an tla dawn tihna a ni a, mahse endiktu ten mi 10 aia tam pawh an titling thei! Con­testant an ṭhat tlan tawh em avangin endiktute tan pawh rilru a buai viauin a rinawm a, an kutah eng­­kim a innghah bawk si avangin huai­sen taka thutlukna an siam a ngai.

Tlin inring tak tak pawh tla an awm nual dawn a, chu chu a boruak ti 'hot' zualtu tur pawh a ni. Intihsiakna a nih miau avangin tla an awm a ngai a, Idol nih tuma inbeihna boruak a nung chho tial tial dawn a ni.

Pangzawl tlangval chu...
Mizo Idol intihsiaka boruak nei lian ber pakhat chu Jonathan Lalengzauva a ni. Ani hian endiktute leh mipui lawm a hlawh a, Mizo rilrem zawng tak hla a sak ṭhin avangin a dinhmun a sawh nghet zel.

'Tlangvaltea' tia judge-te'n an koh fiam Jonathana hian top 20-ah hian 'Phengphe khua a tlai zo ta' tih hla a sa a, Rinzauva Sailo chuan, "I ke lehlamin top 10 i rap tawh" tiin a sawi hial! Robina chuan, "I aw rawl a dik, beisei angin i che zel," tiin a fak a, Feli Thangluah pawhin, "I aw a dam, ngaihthlak a nuam," tiin a fak ve bawk.

Contestant zingah top 10 lut tur khawpa che ṭha an awm nual a, zaninah engkim a chiang dawn a ni. Top 10 lut te hian September 4 zan aṭangin intihsiak an hmachhawn leh dawn a ni.