Ed Sheeran-a'n film a chang dawn!

British pop star Ed Shee­ran chu Danny Boyle film siam leh turah a chang dawn a, a phur tawh hle.

English film director lar Danny Boyle chuan khawvel deng chhuak khawpa lar The Beatles te pualin film a siam dawn a, nakkum September thlaah tihchhuah tum a ni. English rock band lar The Beatles puala film siam turah hian Ed Sheeran hian role pawimawh tak a play dawn a nih hmel a, a ṭawngpawr tawh hle!

Perfect singer Sheeran chuan, "Tour ka nei dawn a, ni li chhung inbuatsaih nan ka hmang dawn a, a bak ni thum chu film shooting atan ka hmang dawn a ni," tiin, kar khatah music leh film atan a insawrbing tur thu a sawi. "Thla hnih thum chhung vel chu tiang hian hun ka hmang dawn a, a phurawm tawh hle a ni," a ti bawk.

Kum 27 Sheeran hian Hollywood luhchilh a chak ve thu a lo sawi fo tawh ṭhin a, chutih rual chuan 'actor' nih chu a chak loh thu a sawi thung.