Spider-Man in a ngam loh a tawng ve ta

Scream a bengchheng nghal hle!
Tlangzarh a nih aṭanga thla khat vel zet Box Office-a ro a rel hnuah 'Spider-Man: No Way Home' chuan a ngam loh a tawng ve ta a, 'Scream' chuan North America Box Office-a 'Spider-Man' rorelna tihtawp sak a ni.

'Scream' a bengchheng
'Scream' reboot film 'Scream 5' tia mi ṭhenkhatin an sawi bawk hi Zirtawpni liam taah khan US-ah tlangzarh a ni a, $maktaduai 24 vel senga film an siam hian tun kar tawp liam ta khan North America-a theatre 3,664 aṭangin $30,040,000 a lalut a, sum lalut tam ber a ni.

Kum 26 liam taa tlangzarh 'Scream' film hmasa bera kan hmuh Friends star Courteney Cox bakah Neve Campbell leh David Arquette-te chu he film-ah hian an inlan leh a, chu chu fan-te hiptu ber pakhat pawh a ni ngei ang. 'Scream' film hmasa ber aṭanga kum 25 liam hnua thil thleng anga chan niin, nimin thleng khan $mtd 48 lai sum a lalut tawh.

Film review-tu lamin he film hi an fak tlangpui a, RottenTomatoes-ah rating 6.6/10 a hmu a ni.

Spider-Man sum lakluh a la tam tho
Tlangzarh a nihna rei deuh tawh mah se 'Spider-Man: No Way Home' chuan sum a la lalut tam viau mai. Kar liam ta khan theatre 3,925 aṭangin $20,100,000 lai a lalut leh a, ram hrang hrang aṭanga a sum lakluh tawh zat chu $1,629,224,074 zet a ni tawh.

Sony Pictures film siam tawh zinga sum lalut tam ber 'Spider-Man: No Way Home' hi khawvela film sum lalut tam pariatna a ni mek a, Mexico ramah phei chuan sum lalut tam ber a ni hial tawh nghe nghe.

Anime film 'Belle' sawi lawk ang
Japanese animated science fantasy film 'Belle' chu North America-a theatre 1,326-ah kar liam ta khan chhuah a ni a, $1,645,800 lalutin sum lalut tam parukna a ni. He anime film hi Japan ram lamah chuan a hlawhtling rem rem hle a, nikum chhunga Japanese film sum lalut tam pangana a ni phak hial. US pawn lamah $58,288,161 lai sum lalut tawhin he film hian $59,933,961 lai ram hrang hrang aṭangin sum a lalut tawh.

'Scream' leh 'Belle' bakah hian film tlangzarh thar Box Office Mojo chart-a lang pakhat a awm a, chu chu 'Who We Are: A Chronicle of Racism in America' niin 20-na a ni a, theatre pali-ah chiah an chhuah a ni.

Box Office Top 10:-
1 Scream $30,040,000
2 Spider-Man: No Way Home $20,100,000
3 Sing 2 $7,950,000
4 The 355 $2,260,000
5 The King's Man $2,233,000
6 Belle $1,645,800
7 American Underdog $1,594,000
8 West Side Story $942,000
9 Licorice Pizza $883,000
10 The Matrix Resurrections $823,000