Science & Environment ; Mount Victoria Babax sava kum 25 hnuah Mizoramah hmu

Mount Victoria Babax sava chu India ramah kum 25 chhung hmuh a nih tawh loh hnuah kar hmasa Nilaini khan Phawngpui (Blue Mountain) National Park-ah hmuh a ni.

Sava chanchin ngaihventu pahnih chuan he sava hi January 12 khan a thla an la fuh a, kum 1997 hnuah India ramah heng savate hi hmuh an ni tawh loa, hmuh a ni leh hian ngaihven a hlawh hle.

Thlalatu birder pahnih- Delhi lam mi Puja Sharman leh a Cornell Lab of Ornithology of Cornell University, US-a digital media manager Andrew Spencer-te hi bird-sound recordists a ni a, kar hmasa tir lam aṭang khan Phawngpui leh a chheh velah hian sava zirchiang hian an awm tawh a, January 12 zing dar 6:30 velah khan sava hram ri chu an hre ta tih an sawi. An awmna aṭanga khaw hnai ber Thaltlang lama let leh tura an inbuatsaih laiin sava hram chu an hre ta tih sawiin, a hramna lam chu an enfiah hnuah Oak thingkungah fuin a thla an lak bakah video-te pawhin an la tih an sawi a ni.

Mount Victoria Babax (Pterorhinus woodi)-te hi laughingthrush chhungkaw zinga mi Leiothrichidae chi khat an ni a, Mizoram leh Myamnar-a Chin state velah hmuh an ni ṭhin. Nikum November thlaa Bird Count India-in article an tihchhuahah chuan India rama sava hmuh tur vang 20 an thlan chhuah zingah pawh pariatna a ni phak hial.

Heng savate hi English ornithologist Frank Finn chuan kum 1902 khan a lo zirchiang tawh a, kum 2005 thleng kha chuan Chinese Babax chi khat anga ngaih ni mah se American ornithologist- Pamela Rasmussen leh John Anderton-te chuan kum 2005 khan sava chi hrang anga ngaih tur a nih thu an puang a ni.

Puja Sharman,"Heng sava ang chite an awm a ni tih finfiah a nihna hian Phawngpui National Park leh a chhehvel chu venhim a ṭul hle a ni tih a tilang," tiin a sawi bawk.