Lenlai huapzo season 2 DDK-ah chhuak ṭan leh

Mali Hlondo-in ṭhalaite lawm zawng tak show a buatsaih Lenlai huapzo season 2 chu DDK-ah nizan aṭang khan a chhuak ṭan leh tawh.

Lenlai huapzo season 2 DDK-ah hian kan la hmelhriat lutuk loh mipa co-host thar Davis Junior a inlan a, season 2 bulṭannaah hian Nunu Rualhleng chu a inlan a ni. Nunu-i hian a Bollywood experience hrang hrang a sawi. Nizan show kha epidose 15-na a ni tawh a, Thawhlehni zan apiangin dar 8-8;30 inkarah a chhuak ṭhin dawn a, DDK lama en hman lo tan Lenlai production YouTube channel lamah a en theih dawn bawk.

He show-ah hian Mali Hlondo hi host a nih bakah show producer a ni nghal a, videographer chu Vanlalhruaitluanga a ni thung. Mali chuan season 2-ah hian mi hrang hrang kawm an nih dawn thu Vanglaini hrilhin,"Mizo enterpreneur-te harsatna hmachhawn dan hrang hrang tarlan a ni dawn. Mizo film siamtu lar Mapuia Chawngthu pawh a la inlan dawn bawk.

Mizo-in I-League player kan neihte bakah Mizoram basketball player ṭha zualte pawh an la lang dawn a ni. Mizo talent nei ṭhate kan hmaih dawn lo bawk a ni. He program kan en theih chhan hi FCS&CS dept.- te an ni a, an chungah kan lawm hle," tiin a sawi.