Idol ni thei mi 11 chiah an awm ta!

Zonet chuan Mizo Idol Season 6-a top 10 tling te an puang ta a, Idol ni thei turin mi 11 chiah an awm ta. Top 10-ah hian mipa paruk leh hmeichhia panga an tling a, September 5 zanah live music nen intihsiak an hmachhawn zui dawn a ni.

Top 20 intihsiak chu August 29 & 30 zan khan Zonet Studio-ah neih a ni a, nizan khan result hi puan a ni. Kum dangah pawh top 10-ah mi 10 aia tam an tlin chang a lo awm tawh ṭhin a, kuminah pawn contestant an ṭhat tlan avangin mi 11 an tling.

Mizo Idol Season-a inlan zui zel tur te lakah hian beiseina a sang a, mipui lam pawhin show an hlut hle a ni tih a hriat. Show hmuhnawm leh intihsiak boruak nung tak en tur a awm zui zel dawn.

Mipa an chungnung
Top 20-a inlan zingah hmeichia an tam zawk a, intihsiak hautak zawk hmachhawn tura tling erawh a tlem zawk an ni ta. Judge te chuan mipa lamin originality an nei ṭha zawk niin an sawi a, chu chu result-ah pawh a lang. Intihsiak hmachhawn zui zel thei tura mipa paruk an tlin laiin hmeichhe lamah chuan - Immanuel Lalawmpuii, H. Lalnunsiami, Lalduhawmi, Malsawmdawngkimi leh Chawnpui nula R. Lalmalsawmi te chiah an dam tawh a, hmeichhe Idol kan nei leh thei angem tih chu a hriat thuai dawn.

Mipa lamah - Peter Lalnunpuia, Andrew K. Lalchhandama, Morris Haulien-a, Jerry Lalrinawma, Ticos Darhmingliana leh Pangzawl tlangval Jonathan Lalengzauva te an lan tlin avangin intihsiak boruak a 'hot' zual dawn a ni.

Top 10 aṭang chuan live music a nih tawh dawn avangin inbuatsaihna ṭha zawk neih a ngai dawn a, zaithiam te bakah an musician te an pawimawh dawn hle a ni.

Top 10 chin hian hunawl an nei meuh dawn lo a, hla zirin hun an hmang tlut tlut dawn a ni. Duhsakna thilpek pe duh tan pawh inbuatsaihna ṭha zawk an neih theih nan Zonet Office-ah dah sak a finthlak hle ang.

Top 10 lut te chu....

Immanuel Lalawmpuii (Teawmi)

'Teawmi' tia an koh Zemabawk nula Immanuel Lalawmpuii hian top 20 intihsiakah khan 'Hmangaihna vanduai' tih hla thiam takin a sa a, endiktute rilru a hneh hle. Robin Lalremruata chuan, "I aw a flexible a, Idol tihlutu zinga mi i ni," tiin a fak. Teawmi hian a aw nalh leh danglam tak a dinchhuahpui a, top 10 a inhlangkai pawh hi a awm viau reng a ni. Feli Thangluah chuan, "Aw nalh dangdai tak i nei a, i zai ngaithlak a nuam tak zet a ni," a ti. Rinzauva Sailo pawhin,"I aw a felfai a, a ngaihnawm hle a ni. I ke leh lamin top ten i rap tawh e," tiin a fak a, a hlasak 'Hmangaihna vanduai' sa tawh zingah thiam a tih ber a nih thu a sawi bawk.

Peter Lalnunpuia (Petera)

Chanmari West tlangval Peter Lalnunpuia hi zan khatnaah a zai a, judge te pawhin an fak viau. Top 20-ah khan 'Chatuanin' tih hla a sa a, a aw mil tur hla a thlang thiam hle. A zai zawh hian Feli Thangluah chuan, "I zai ṭha a, i theihna i pho chhuak ṭha hle a ni," tiin a sawi a, Rinzauva pawhin "I zai tha thawkhat viauin ka hria," a ti ve bawk.

Andrew K. Lalchhandama (Andrew)

Top 20-a medley sa awm chhun a ni a, 'Zo James Blunt' tiin hming lem an pe. Darlawn tlangval Andrew hian thiam takin 'Van nuamah chuan tute nge cheng' tih leh 'A kut phah ropui chhungah' tih hla a sakpawlh a, a hnehsawh hle. Robin-a chuan, "I theihna i pholang thiam hle mai, i aw a danglam tak - aw te leh aw lian inchawhpawlh lai pawh a hriat mang loh," tiin a zai a comment. Andrew hian aw sin a hmang thiam hle a, top 10 inhlankai nan a hmang ta a ni.

H. Lalnunsiami (Mami)

Champhai aṭanga top-a tling awm chhun H. Lalnunsiami hian Jennifer Hudson hla, Mizo ṭawnga lehlin hmangin a zinkawng zawh mek a pawtsei a, a lakah beiseina a sang hle. Nunsiami hian a theihna tak tak a la phochhuak tawk lo niin endiktute chuan an la ngai cheu a, chu chuan a theihna san zia a tilang. Feli Thangluah chuan, "I hla sakah khan sawisel tur vak a awm lo, nangmaha theihna awm kha rawn pho chhuak zel rawh," a ti a, Robin-a pawhin, "Kha aia la zai ṭha thei tur kha i ni," tiin a talent neih ṭhat zia a sawi.

Lalduhawmi (Awmawmi)

Robin Lalremruata'n, "Sawisel tur a awm vak lo, a dik thlup mai. I aw ngiathlak a nuam a, i theihna i pholang," tia a fak Awmawmi'n top 10 a lut hi a mak lo. A hlasak a hnehsawh a, track-in a pui ṭha hle bawk. Ruallung tihmingṭhatu Lalduhawmi (Awmawmi) hian top 20-ah khan 'Min tir ta che' tih hla a sa a, judge te fak pawl tak a ni.

Morris Hauliena (Morris)

Manipur aṭanga Mizo Idol-a tel ngat a ni a, a tum pawh a ruh hle ang tih a rinawm. Morris-a hi intihsiak neih tawh china mi hriat hlawh ber pawl a ni a, top 10-a a inhlangkai pawh hi a awm viau a ni. Morris Hauliena hian F. Vanlalhriatrenga hla phuah 'Ka bah hnukte' tih hla a sa a, a aw fit zia a pholang. Chutih rual chuan a hla thu lam fiah tawk lo chu endiktute ngaimawh a ni a, hmasawn zelna tur a nei.

Malsawmdawngkimi (Dawngkim)

Kolasib Vengthar nula Malsawmdawngkimi hian Immanuel MS Fanai hla lehlin 'Halleluiah' tih hla a sa a, a aw mil tur hla a tlangthiam hle. A zai a nung a, theihna sang tak a nei tih Zoram mipui hmuhah a pholang. Dawngkimi hian aw mawi danglam tak a nei a, a sang leh hniamah a aw a nghet ṭha hle. A zai laiin a theihna zawng zawng a sawmkhawm a, judge te pawhin an fak hle a ni.

Jerry Lalrinawma (Jerry)

A hmel en mai chuan zai mi ni pawhin a lang lo, mahse Chanmari tlangval Jerry Lalrinawma hian top 10 inhlangkai turin harsatna a nei lo. Feli Thangluah chuan, "I zai thiam thlawt" tiin a fak a, a theihna a phochhuak ṭha hle tih a chiang. Robin-a pawhin, "A sang leh hniamah i zai ṭha a, i theihna a lang chhuak ṭha hle a ni," tiin a fak ve bawk.

Ticos Darhmingliana (Ticos)

Mizo Idol Season 6-a boruak siam hat thei Ticos Darhmingliana zai thiam zia sawi nawn a ngai lo a, result puan hma pawha top 10 lut tur zinga mipui rinkai a ni. Ticos-a hian top 20-ah khan Gnat Lalrinchhana hla 'Mampui' tih chu cool takin maiin a sa a, a hla thuah a cheng hle tih a hmelah a lang. Judge te pawhin an fak a, Robin-a chuan, "I saktur awm tak i thlang a ni, a hniam leh sang laiah i aw a ngai reng a i sa lungrun thiam hle mai," a ti. Mahni style hlawhtlinpui mek Ticos-a hi endiktuten ke leh lama top 10 rap tawh an sawi zinga mi a ni tih hriat tel a ṭha awm e.

R. Lalmalsawmi (Sawmtei)

Chawnpui nula R Lalmalsawmi hian Vankhama hla phuah 'Awmkhawhar lenkawl' tih hla a sa a, Mizo Idol ni thei turin rahbi a tuk chho zel. Sawmtei hi intihsiaka boruak nei lian ber te zinga mi niin, a zai ngaithlak tur awm zel pawh hi chanchin lawmawm tak a ni. Judge te fak pawh a hlawh a, enbik tur zinga mi a ni.

Jonathan Lalengzauva (Jonathan)

'Phengphe khua a tlai zo ta' tih hla nen top 20 zan khatnaah a zai a, a thiam leh pek hle. Pangzawl tlangval hi a thua top 10 lut hmasa ber tih theih a ni a, endiktuten ke leh lama top 10 rap an tih kha a ni. A aw rawl a dik a, beisei anga a che zel thei a nih chuan Idol hial ni thei tur zinga mi a ni. A zai hi Mizo rilrem zawng tak a nih ṭhin avangin ngainat pawh a hlawh a, Mizo Idol tihlutu zinga pakhat a ni.