'Queen of Soul' Aretha Franklin Ropui takin vui liam a ni ta

'Queen of Soul' Aretha Franklin chu kar kalta Zirtawpni khan ropui taka vui liam a ni ta a, a ruang hi Woodlawn Cemetery-ah zalh a ni. Aretha hi ni li chhung zet a sunna hun hman a ni a, Detroit khawpuiah amah ngaisangtu mi sang tam tak an fuan khawm a ni.

Aretha Franklin puala hun hnuhnung hi Zirtawpni khan buatsaih niin, milar fuankhawm an ṭhahnem hle. Ariana Grande chuan Aretha hla '(You Make Me Feel Like) 'A Natural Woman' hmangin 'Queen of Soul' hi a thlah liam. Ani bakah hian Ronald Isley, Faith Hill, Chaka Khan, Jennifer Holliday leh Jennifer Hudson te an inlan bawk.

Shirley Caesar, Stevie Wonder, Eric Holder, Gladys Knight, Tyler Perry, Smokey Robinson leh Yolanda Adams te hmel hmuh tur a awm bawk a, US president hlui Bill Clinton chuan thu a sawi ve bawk. Aretha Franklin vauina hun hi Greater Grace Temple-ah neih a ni a, Bishop Charles H. Ellis III chuan a kaihhruai a, Rev. Al Sharpton chuan thuchhah a sawi a ni.

August 16-a kum 76 mi nia boral Aretha Franklin hi a pa Rev. C.L. Franklin an phumna hmun Woodlawn Cemetery-ah zalh a ni. He hmunah vek hian a laizawn te pahnih phum an lo ni tawh bawk. A vuina hun hian darkar riat vel zet a awh a, amah ngaisangtu mi tam tak chu kawtthlerah an pungkhawm a ni.